Presidenti ukrainas, Volodymyr Zelensky vizitoi Iziumin e sapoçliruar në rajonin verilindor të Kharkiv të mërkurën, pesë ditë pasi forcat e vendit rimorën qytetin.
Fotografitë në faqen e “Facebook” të një njësie të ushtrisë treguan Zelensky në një ceremoni në sheshin kryesor. E pranishme ishte edhe zv.ministrja e Mbrojtjes, Hanna Maliar.
“Më parë, kur shikonim lart, gjithmonë kërkonim qiellin blu. Sot, kur shikojmë lart, ne kërkojmë vetëm një gjë – flamurin e Ukrainës,” tha Zelensky në një postim në kanalin presidencial Telegram.
Në ceremoni u mbajt një minutë heshtje për të kujtuar ata që kishin humbur gjatë operacioneve ushtarake.
Forcat ukrainase morën përsëri kontrollin e Izium të shtunën, duke shënuar një goditje të madhe strategjike ndaj sulmit ushtarak të Rusisë në lindje.
Izium, i cili ndodhet pranë kufirit midis rajoneve Kharkiv dhe Donetsk, ishte nën pushtimin rus për më shumë se pesë muaj dhe u bë një qendër e rëndësishme për ushtrinë pushtuese.
Moska po përdorte Izium si një pikënisje për sulmet në jug në rajonin e Donetsk dhe Kupyansk, rreth 30 milje në veri të Izium, si një qendër hekurudhore për të rifurnizuar forcat e saj.
