Presidenti i Ukrainës, Volodymyr Zelensky, ka bërë të ditur se ka kthyer dekoratën më të lartë shtetërore të Polonisë, pas deklaratave të presidentit polak Karol Nawrocki se do t’i hiqej ajo
Dekorata, “Urdhri i Shqiponjës së Bardhë”, i ishte dhënë Zelenskyt në vitin 2023 nga ish-presidenti Andrzej Duda.
Vendimi vjen në një kohë tensionesh diplomatike mes Kievit dhe Varshavës, të nxitura nga një vendim i Ukrainës për të riemërtuar një njësi ushtarake me emrin e një grupi të diskutueshëm të Luftës së Dytë Botërore, Ushtria Kryengritëse e Ukrainës (UPA).
Në Poloni, ky grup konsiderohet përgjegjës për masakra ndaj civilëve polakë gjatë viteve 1943–1945, ndërsa në Ukrainë disa e shohin si lëvizje që luftoi për pavarësi kundër forcave sovjetike, Gjermanisë naziste dhe autoriteteve polake.
Në një reagim në rrjetet sociale, Zelensky tha se Ukraina mbetet e hapur për bashkëpunim me Poloninë dhe për dialog mbi interpretimet e së kaluarës historike, duke theksuar mirënjohjen për mbështetjen polake gjatë luftës.
Edhe disa zyrtarë të tjerë ukrainas kanë vendosur të kthejnë dekorata polake në shenjë solidariteti me presidentin e tyre.
Nga ana e tij, presidenti polak Karol Nawrocki e ka cilësuar vendimin e Ukrainës për emërtimin e njësisë ushtarake si “të papranueshëm” dhe “shumë zhgënjyes”, por ka theksuar se kjo çështje nuk do të ndikojë në mbështetjen e Polonisë për Ukrainën në luftën kundër Rusisë.
Ndërkohë, kryeministri polak Donald Tusk u ka bërë thirrje të dy palëve të ulin tensionet, duke paralajmëruar se përplasjet mes aleatëve vetëm sa i shërbejnë interesave të Rusisë.
Polonia mbetet një nga aleatët kryesorë të Ukrainës, duke pritur qindra mijëra refugjatë dhe duke shërbyer si qendër kyçe për ndihmën ushtarake dhe humanitare drejt Kievit, ndërsa Ukraina po vijon procesin e afrimit drejt Bashkimit Evropian
