Banorët e fshatit Siniçan, bashkë me Kryetarin e Komunës së Bogovinës dhe prokuroren kujdestare ende vazhdojnë të qëndrojnë në bjeshkë përballë policisë.
Edhe pse prokurorja e rastit pasi konstatoi situatën faktike në terren, u dha urdhër policëve që të largohen dhe t’i lejojnë banorët të vazhdojnë me punë, policia nuk po e zbaton urdhrin.
“Ligji për procedurë penale është i qartë. Procedurën parahetimore dhe hetimore e udhëheq prokuroria publike. Policia duhet ta zbatojë urdhrin e prokurorit publik sepse kështu e obligon ligji”, theksoi prokurorja kujdestare.
Megjithatë, ende nuk dihet se urdhrat e kujt po zbaton policia.
Nga Aleanca për Shqiptarët akuzuan se kjo bëhet për hakmarrje politike nga Ministri Teknik, Agim Nuhiu.
