Sekretari i përgjithshëm i Aleancës për Shqiptarët Arben Taravari, sot në konferencë për shtyp ka konfirmuar bashkëpunimin me VMRO-DPMNE-në në zgjedhjet lokale. Sipas Taravarit ky bashkëpunim vjen si rezultat i takimit Zaev – Ahmeti ku u bë publike koalicioni i partive në pushtet për zgjedhjet lokale.
Kah fundi janë negociatat mes koalicionit ASH-AAA dhe VMRO-DPMNE-së për bashkëpunim në zgjedhjet lokale. Sic tha Sekretari i Përgjithshëm i ASH-së, Arben Taravari, bashkëpunimi do të ndodh në komunat ku koalicioni ka interes dhe mund të bëhet edhe në rrethin e parë por edhe të dytë zgjedhor. Marrëveshja me opozitën maqedonase, sipas Taravarit, vjen si rezultat i bashkëpunimit zgjedhor mes partive në pushtet LSDM-së dhe BDI-së.
ARBEN TARAVARI – SEKRETAR I PËRGJITHSHËM I ASH-së
“Ju jeni të njoftuar se para dy-tri javësh një fotografi e përbashkët Zaev-Ahmeti ku u njoftua për bashkpëunim, në disa vende në rrethin e parë, në disa tjera në rrethin e dytë dhe si kundërpërgjigje ndaj kësaj nuk na mbetet gjë tjetër që edhe ne të mendojmë për bashkëpunim me VMRO-DPMNE-në. Sinqerisht, kemi patur kontakte, jemi duke negociuar dhe jemi duke përfunduar me negociatat dhe sipas të gjitha gjasave ASH-AAA së bashku do të kenë bashkëpunim, në disa komuna në raundin e parë në disa në raundin e dytë zgjedhor, në bazë të vlerësimeve të komunave ku ka arsye dhe matematika që na bashkojnë për t`i fituar ato komuna.
Taravari në press-konferencën e sotme tha se shumë qytetarë, që nuk ndajnë bindjet e njëjta politike me qeverinë aktuale, të punësuar në institucione, organe publike dhe shtetërore kanë denoncuar për presione, mobbing dhe revanshizëm politik nga pushteti actual.