Seria e jashtëzakonshme e Unai Simón pa pësuar gol në Kupën e Botës ka marrë fund. Portieri i Spanjës vendosi një rekord të ri historik me 650 minuta paprekshmëri, para se Charles De Ketelaere ta mposhtte në çerekfinalen ndaj Belgjikës.
Sulmuesi belg shënoi me kokë në minutën e 41-të, duke i paraprirë Pau Cubarsí-t në zonë dhe duke i dhënë fund një serie që kishte nisur në Botërorin e Katarit dhe përfundoi në Los Anxhelos.
Më herët gjatë këtij Botërori, Unai Simón kishte kaluar rekordin e legjendës italiane Walter Zenga, i cili kishte mbajtur portën të paprekur për 517 minuta radhazi në ndeshjet e Kupës së Botës. Portieri spanjoll e thelloi këtë rekord edhe në përballjet ndaj Portugalisë dhe Belgjikës, duke e çuar në 650 minuta.
Në Botërorin 2026, Simón nuk kishte pësuar asnjë gol në pesë ndeshje radhazi ndaj Kepit të Gjelbër, Arabisë Saudite, Uruguait, Austrisë dhe Portugalisë. Këtyre iu shtuan edhe minutat e fundit të sfidës ndaj Japonisë dhe e gjithë ndeshja e 1/8-ave kundër Marokut në Botërorin e Katarit.
Pas vendosjes së rekordit, portieri spanjoll kishte zgjedhur t’ia atribuonte suksesin skuadrës.
“Ky rekord flet më shumë për ekipin sesa për mua. Jemi shumë krenarë për punën që po bëjmë, sepse u lejojmë kundërshtarëve shumë pak raste për shënim”, ishte shprehur Unai Simón
