Mosmiratimi i Kodit Zgjedhor, sipas VMRO‑DPMNE‑së, është dëshmi se SDSM, Levica dhe BDI po e bllokojnë përparimin e shtetit dhe se lojërat e tyre politike janë vendosur mbi interesin e qytetarëve.
Sipas partisë, mosmiratimi i Kodit të ri Zgjedhor konfirmon se këto tre parti janë të gatshme të bllokojnë çdo proces që nënkupton avancim për shtetin, vetëm për interesa të veta politike.
“Kodi Zgjedhor nuk është çështje e politikës ditore, por proces i rëndësishëm reformues. Miratimi i tij është i domosdoshëm për harmonizim me rekomandimet e OSBE/ODIHR‑it, për përmbushjen e obligimeve nga Agjenda Reformuese dhe për sigurimin e përparimit shtesë dhe përfitimeve për qytetarët.
Maqedonia ka realizuar me sukses 9 nga 10 reformat e Agjendës Reformuese. Pengesa e vetme mbetet bllokada e udhëhequr nga SDSM, Levica dhe BDI.
Sjellja e SDSM‑së, BDI‑së dhe Levicës tregon se sa herë që kanë mundësi, në vend që të punojnë për interesat shtetërore, ata zgjedhin obstruksione dhe kalkulime politike. Për ta, më e rëndësishme është strategjia partiake sesa përparimi i Maqedonisë dhe përfitimet për qytetarët.
Në vend që të marrin përgjegjësi dhe të kontribuojnë në miratimin e një ligji që është në interes të të gjithëve, SDSM, BDI dhe Levica përpiqen të krijojnë dramë politike dhe të paraqiten si viktima.”
Partia thekson se qytetarët duhet të dinë se kush e pengon zhvillimin dhe kush punon kundër reformave.
Siç shtohet më tej, mundësia e humbur për miratimin me kohë të Kodit Zgjedhor nënkupton rrezik për humbjen e mjeteve dhe mundësive shtesë nga Plani për Rritje.
“Lojërat politike të SDSM‑së, BDI‑së dhe Levicës nuk do ta ndalin rrugën e reformave. Qeveria e VMRO‑DPMNE‑së do të vazhdojë të punojë për përparimin e shtetit, ndërsa përgjegjësia për bllokadat mbetet te ata që i shkaktojnë.”
