LSDM ka reaguar ashpër ndaj deklaratave të kryeministrit Hristijan Mickoski lidhur me avancimin e Ukrainës dhe Moldavisë në procesin e integrimit evropian, duke e akuzuar atë se po pengon rrugën evropiane të Maqedonisë së Veriut dhe po e përdor opozitën si justifikim për mungesën e rezultateve.
Nga LSDM thanë se deklaratat e Mickoskit, në të cilat ai akuzoi opozitën se ka vepruar kundër interesave të shtetit, janë skandaloze dhe hipokrite.
“Sot, Hristijan Mickoski u përpoq të fshihej pas Ukrainës dhe Moldavisë dhe të akuzonte opozitën maqedonase se po punon kundër vendit të vet. Kjo nuk është vetëm skandaloze, por edhe jashtëzakonisht hipokrite”, thuhet në reagimin e partisë opozitare.
Sipas LSDM-së, ndërsa Ukraina dhe Moldavia po bëjnë hapa përpara drejt Bashkimit Evropian, kryeministri po e mban vendin në vendnumëro për të mbrojtur interesat e tij politike.
Partia opozitare vlerëson se Qeveria nuk ka realizuar reformat e premtuara, të cilat sipas tyre duhej të përfundonin deri më 1 qershor.
“Në vend që të zbatojë reformat që vetë i premtoi, Mickoski nuk ka rezultate. Kjo është arsyeja pse ai tani po sulmon opozitën, për të mbuluar dështimin e tij dhe mungesën e çdo plani për rrugën evropiane”, theksojnë nga LSDM.
Në reagim, LSDM kritikoi edhe krahasimet që kryeministri bëri me Ukrainën dhe Moldavinë, duke pretenduar se qeveritë e këtyre vendeve nuk veprojnë në funksion të interesave të jashtme dhe nuk e bllokojnë procesin e integrimit evropian.
“Krahasimi me Ukrainën dhe Moldavinë është i turpshëm. Qeveritë në këto vende nuk punojnë për Aleksandar Vuçiqin, nuk e bllokojnë rrugën e tyre evropiane për interesat e strukturave kriminale dhe ndikimeve ruse. Ata nuk bashkëpunojnë me Viktor Orbanin, nuk marrin kredi kineze përmes vendeve të treta dhe nuk dërgojnë anëtarë të qeverisë për të negociuar për interesat e Kinës, ndërsa vendet e tyre janë anëtare të NATO-s”, thuhet në reagim.
Përplasjet mes pushtetit dhe opozitës rreth integrimit evropian vazhdojnë në një periudhë kur vendi përballet me sfida të rëndësishme në procesin e negociatave me Bashkimin Evropian dhe zbatimin e reformave të kërkuara nga Brukseli.
