Komisioni i Drejtësisë i parlamentit të Turqisë nisi shqyrtimin e Projektligjit “Për Forcimin e Solidaritetit Kombëtar dhe Integrimit Social”, i cili u paraqit në parlament në fillim të kësaj jave si pjesë e nismës së vendit “Turqia pa terror”.
Duke hapur mbledhjen, kryetari i Komisionit të Drejtësisë, Cuneyt Yuksel, tha se projektligji parashikon “mekanizma të jashtëzakonshëm dhe të përkohshëm ligjorë”, të cilët i nënshtrohen kushteve të caktuara në lidhje me disa hetime, ndjekje penale dhe ekzekutimin e dënimeve përfundimtare me burg.
Yuksel theksoi se projektligji nuk përbën amnisti dhe nuk do të shfuqizojë dënimet, nuk do të ndryshojë natyrën juridike të veprave penale dhe nuk do të heqë përgjegjësinë penale.
Ai tha se mekanizmat e parashikuar në projektligj mund të zbatohen vetëm pasi institucionet e sigurisë të verifikojnë se organizata terroriste PKK/KCK dhe strukturat e lidhura me të kanë ndërprerë aktivitetet e tyre dhe kanë dorëzuar armët, si dhe pasi Këshilli i Sigurisë Kombëtare ta konfirmojë këtë përcaktim me një vendim të publikuar në Gazetën Zyrtare.
Projektligji prej 12 nenesh u paraqit në parlament të mërkurën me nënshkrimet e rreth 360 deputetëve.
Ai parashikon shtyrjen e disa hetimeve, ndjekjeve penale dhe ekzekutimit të dënimeve që lidhen me veprat penale të kryera në kuadër të aktiviteteve ose në emër të PKK/KCK-së, me kusht që të plotësohen kriteret e përcaktuara.
Vrasja me dashje dhe drejtuesit e organizatës përjashtohen nga rregullimi i propozuar.
