Josko Gvardiol beson se Enzo Maresca është zgjedhja e duhur për të drejtuar Manchester Cityn pas largimit të Pep Guardiolës.
Tekniku italian firmosi një kontratë trevjeçare dhe debutoi në stolin e skuadrës në miqësoren ndaj Interit në Hong Kong, të humbur pas penalltive.
“Niveli është shumë i lartë dhe ai është zgjedhur për një arsye. Ka cilësi, ide të reja dhe mendoj se është njeriu i duhur”, deklaroi Gvardiol.
Mbrojtësi kroat pranoi se ndryshimi i trajnerit kërkon kohë, pasi skuadra duhet të përshtatet me stilin, taktikat dhe kërkesat e reja.
“Është diçka krejtësisht e re dhe nuk është e lehtë të ndryshosh trajner. Detyra jonë është ta ndihmojmë dhe të përshtatemi sa më shpejt”, shtoi ai.
Duke folur për largimin e Guardiolës, Gvardiol tha se njoftimi erdhi në momentin e duhur, pasi një vendim i bërë publik më herët mund të kishte ndikuar psikologjikisht te lojtarët.
Sipas tij, pas dhjetë vitesh në krye të Cityt, Guardiola kishte nevojë për pushim, megjithëse nuk përjashtoi mundësinë e një rikthimi në të ardhmen.
Manchester City po përgatitet gjithashtu për ndryshime në grupin e kapitenëve, pas largimeve të Bernardo Silvës dhe John Stones.
Ruben Dias shihet si kandidati kryesor për shiritin, ndërsa Gvardiol deklaroi se është i gatshëm të marrë më shumë përgjegjësi.
Mbrojtësi kroat ka rinovuar kontratën me Cityn edhe për pesë vite, duke konfirmuar të ardhmen e tij në “Etihad”.
