Opozita LSDM në konferencën e sotme për media paraqiti akuza serioze për gjendjen me ujin e pijshëm në Gostivar dhe në mbarë vendin, duke kërkuar reagim të menjëhershëm nga Prokuroria Publike.
Simona Cvetanovski, anëtare e Kryesisë së LSDM‑së, deklaroi se është konfirmuar prania e një bakterie të rrezikshme në Gostivar, ndërsa autoritetet, në vend të përgjegjësisë, po merren me marrëveshje biznesi.
“Uji në Gostivar ende është i rrezikshëm, zyrtarisht është konfirmuar prania e bakteries Pseudomonas aeruginosa. Mbi 50 vendbanime në vend kanë ujë të ndotur, tender‑patriotët Mickoski dhe Klekovski e helmuan gjithë Maqedoninë”, deklaroi Cvetanovski.
Ajo i drejtoi kritika ministrit të Punëve të Brendshme Pançe Toshkovski dhe ministrit të Shëndetësisë Sasho Klekovski, duke pyetur pse vetëm tani paralajmërohen analiza të reja, pasi qytetarët tashmë kanë kërkuar ndihmë mjekësore.
“Ditë me radhë opinioni u bindte se uji është ‘teknikisht i rregullt’, por i vetmi ‘provë’ ishte fjala e Mickoskit. Nuk ka dokument zyrtar. Nuk ka raport të nënshkruar. Nuk ka institucion që merr përgjegjësi dhe ka konfirmuar se mund të përdoret ujë teknik. Ndërkohë, drejtori i Drejtorisë për Mbrojtje dhe Shpëtim, Stojançe Angelov, publikisht konfirmoi se në ujë ka bakterie”, shtoi Cvetanovski.
Nga partia theksojnë se procesi i hiperkhlorimit që po zbatohet sërish do të thotë se uji aktualisht nuk është i sigurt as për pije, as për larje.
“LSDM kërkon që Prokuroria Publike menjëherë të hapë procedurë dhe të konstatojë përgjegjësi penale për rrezikimin e qëllimshëm të shëndetit të qytetarëve. Duhet të ketë përgjegjësi për Hristijan Mickoskin, Sasho Klekovskin dhe Pançe Toshkovskin”, theksoi ajo.
Cvetanovski akuzoi gjithashtu se, ndërkohë që zgjat kriza me ujin, po lidhen kontrata jotransparente për furnizimin e tij.
“Marrëveshje biznesi prej 100.000 eurosh për ujë në Gostivar pa tender, pa shpallje publike. Ndërsa populli helmohet, tender‑patriotët bëjnë biznes. Askush nuk ka të drejtë të luajë me shëndetin e qytetarëve, e aq më pak të përfitojë ndërkohë që populli helmohet”, përfundoi Cvetanovski.
