Largimi i dy avionëve amerikanë të furnizimit me karburant nga Baza Ajrore Bezmer në Bullgari ka sjellë lehtësim te banorët e fshatit dhe zonave përreth, të cilët prej javësh druheshin se prania e mjeteve ushtarake amerikane mund ta kthente rajonin në objektiv të mundshëm të sulmeve iraniane.
Avionët ishin vendosur në Bullgari për të mbështetur operacionet amerikane në kuadër të luftës me Iranin. Vendosja e tyre kishte shkaktuar shqetësim të madh në Bezmer, një fshat me rreth 1,000 banorë pranë bazës ajrore.
Banorët kishin frikë se prania amerikane mund ta bënte zonën objektiv të Iranit. Teherani e kishte paralajmëruar më herët Bullgarinë të mos lejonte përdorimin e territorit të saj për operacione ushtarake amerikane dhe izraelite kundër Iranit.
Sipas raportimeve të mediave ndërkombëtare, përfshirë Financial Times, në rast të përshkallëzimit të konfliktit, Irani kishte shqyrtuar mundësinë e goditjes së objektivave amerikane në Evropën Juglindore, duke përmendur edhe Bullgarinë.
“Lutem Zotit që të mos sulmojnë fshatin tonë”, u shpreh një banore e Bezmerit për Al Jazeera, duke përmbledhur frikën që kishte përfshirë komunitetin.
Protesta dhe mijëra firma kundër pranisë amerikane
Në vetëm dy ditë, banorët e Bezmerit dhe fshatrave përreth mblodhën më shumë se 3,000 nënshkrime kundër vendosjes së forcave amerikane dhe organizuan protesta paqësore.
Kryetari i bashkisë, Rosen Rousseff, tha se banorët përjetuan entuziazëm kur mësuan se avionët ishin larguar. Sipas tij, ata ndien se zëri i tyre më në fund ishte dëgjuar.
Në fund të korrikut, qeveria bullgare kishte propozuar, ndërsa parlamenti miratoi, vendosjen e deri në tetë avionëve KC-135 dhe deri në 250 pjesëtarëve të personelit ushtarak amerikan në bazë.
Qeveria e Sofjes u përpoq të qetësonte banorët, duke deklaruar se inteligjenca ushtarake nuk kishte identifikuar ndonjë kërcënim konkret ndaj sigurisë kombëtare, avionëve amerikanë apo objekteve të tjera në Bullgari. Edhe një vlerësim i kërkuar nga Mbretëria e Bashkuar e konsideronte rrezikun jashtëzakonisht të ulët.
“Ne dridhemi çdo ditë dhe lutemi që lufta të mos vijë këtu. Ne jemi objektivi i parë dhe shumë njerëz do të vdesin”, thanë disa banorë.
Të tjerë, megjithatë, e konsideruan panikun të pabazuar dhe theksuan se shqetësimi i tyre kryesor ishte një incident i mundshëm me raketa interceptuese apo kërcënime që mund të vinin nga Rusia përmes Detit të Zi.
Ministria e Jashtme iraniane ka deklaruar se Teherani rezervon të drejtën t’i përgjigjet çdo veprimi që e konsideron mbështetje për operacionet ushtarake të SHBA-së dhe Izraelit kundër Iranit.
Zëdhënësi i ministrisë, Esmail Baghai, theksoi se Irani “nuk ka problem me popullin bullgar”, duke bërë dallimin mes qytetarëve bullgarë dhe vendimeve të qeverisë së Sofjes.
Ndërkohë, kryeministri bullgar Rumen Radev tha se avionët amerikanë nuk kishin kryer fluturime në jug të aeroportit dhe se më pas ishin zhvendosur drejt vendeve të tjera anëtare të NATO-s për stërvitje dhe ushtrime.
Pavarësisht largimit të tyre, tensionet mbeten. Banorët e Bezmerit druajnë se avionët amerikanë mund të rikthehen dhe se fshati i tyre mund të përfshihet sërish në përplasjen mes SHBA-së, Izraelit dhe Iranit.
Në të njëjtën kohë, autoritetet bullgare përballen me një tjetër sfidë: dezinformimin dhe panikun në rrjetet sociale. Sipas drejtuesve lokalë, grupet në Facebook u mbushën me spekulime dhe komente alarmuese, duke e bërë situatën edhe më të tensionuar.
Për momentin, avionët amerikanë janë larguar nga Bezmeri, por frika e banorëve se konflikti mund të shtrihet në territorin e tyre nuk është zhdukur.
