Një shpërthim i rasteve me salmonelë ka ngritur shqetësim në qytetin e Lamias në Greqi, ku disa persona kanë përfunduar në spital pas konsumimit të ushqimeve të gatshme, kryesisht me bazë pule.
Autoritetet shëndetësore kanë nisur hetimet për të zbuluar burimin e infeksionit, ndërsa qytetarëve u është kërkuar të shmangin konsumimin e pulës për disa ditë, deri në përfundimin e kontrolleve.
17 persona të shtruar në spital, mes tyre edhe fëmijë
Kryetari i këshillit shkencor të Organizatës së Shëndetit Publik Helenik, Theodoros Vasilakopoulos, u shpreh se rastet mund të shtohen edhe në ditët në vijim për shkak të periudhës së inkubacionit të salmonelës, e cila mund të zgjasë disa ditë pas konsumimit të ushqimit të kontaminuar.
Sipas të dhënave nga Spitali i Lamias, deri të martën në mëngjes 17 persona ishin ende të shtruar për shkak të infeksionit. Shumica e tyre janë të rinj nën moshën 31 vjeç, ndërsa mes pacientëve ndodhet edhe një fëmijë 8-vjeçar bashkë me babain e tij.
Rastet e raportuara lidhen me konsumimin e ushqimeve të gatshme nga disa pika të ndryshme shitjeje, ku pjesa më e madhe kanë pasur si përbërës mish pule.
Hetimet çojnë te furnizuesi i pulave
Autoritetet rajonale të shëndetësisë në Greqinë Qendrore kanë identifikuar furnizuesin e dyshuar të pulave që mund të kenë shkaktuar shpërthimin e salmonelës.
Kontrollet janë shtrirë në bizneset që kanë përdorur produktet e dyshuara, ndërsa mostrat e pulës janë dërguar për analiza laboratorike për të përcaktuar origjinën e kontaminimit.
Hetuesit po verifikojnë të gjithë zinxhirin e furnizimit, nga ndërmjetësi deri te njësia e mbarështimit të pulave.
Autoritetet kërkojnë kujdes, por pa panik
Ekspertët shëndetësorë kanë bërë thirrje për kujdes gjatë përgatitjes dhe konsumimit të mishit të pulës, veçanërisht gjatë muajve të verës kur temperaturat e larta rrisin rrezikun e problemeve ushqimore.
Sipas tyre, situata pritet të stabilizohet pasi të përfundojnë kontrollet dhe të identifikohet burimi i plotë i infeksionit
