Autoritetet në Nepal kanë dhënë sërish alarmin për rritje të nivelit të përmbytjeve, duke u bërë thirrje banorëve të zonave pranë lumenjve të qëndrojnë në vende të sigurta.
Agjencia e parashikimit të përmbytjeve në Nepal njoftoi se ka marrë informacione për përmbytje nga ana kineze e zonës së Rasuwa-s.
Sipas njoftimit, lumi Bhote Kosi ka përjetuar sërish rritje të prurjeve. Për këtë arsye, banorëve përgjatë brigjeve të lumit Trishuli, deri në zonën e Mugling, u është kërkuar të qëndrojnë në vende të sigurta dhe të ruajnë vigjilencë të lartë deri në një njoftim të mëtejshëm.
Ndërkohë, mbeten të paqarta rrethanat dhe vendndodhja e saktë e një rrëshqitjeje dheu të raportuar në zonën kufitare mes Nepalit dhe Kinës, pasi informacionet për vendin ku ka ndodhur janë kontradiktore.
Lumi Bhote Kosi ndodhet në qendër të një prej katastrofave më të rënda natyrore që ka goditur rajonin ditët e fundit. Përmbytjet e 26 gushtit kanë shkaktuar qindra viktima, ndërsa mijëra persona rezultojnë ende të zhdukur.
Sipas të dhënave të raportuara, bilanci i viktimave ka arritur në 579 persona, ndërsa operacionet e kërkim-shpëtimit vijojnë në zonat e prekura.
