Udhëheqësi Suprem i Iranit, Mojtaba Khamenei, deklaroi të premten se forcimi i prodhimit vendas është rruga kryesore për përballimin e problemeve ekonomike të vendit, duke bërë thirrje njëkohësisht për uljen graduale të rolit dominues të dollarit amerikan në ekonominë iraniane.
Në një mesazh me rastin e Javës së Qeverisë në Iran, Khamenei i kërkoi qeverisë t’u kushtojë “vëmendje serioze” problemeve ekonomike dhe sociale që lidhen me jetesën e qytetarëve. Ndër sfidat kryesore ai përmendi inflacionin, papunësinë, kontrollin e çmimeve, si dhe rregullimin e tregjeve të mallrave dhe shërbimeve.
Ai kërkoi gjithashtu nxitjen e rritjes ekonomike, rritjen e investimeve dhe orientimin e tyre drejt sektorëve më të nevojshëm, si dhe stimulimin e prodhimit vendas. Sipas tij, politikat e të ashtuquajturës “ekonomi e rezistencës” duhet të jenë në qendër të agjendës ekonomike të qeverisë.
“Çelësi kryesor për zgjidhjen e të gjitha këtyre çështjeve qëndron në mbështetjen gjithnjë e më të madhe te prodhimi vendas”, tha Khamenei.
Ai theksoi se sigurimi i sasive të mjaftueshme të mallrave bazë dhe produkteve të specializuara mbetet i domosdoshëm. Sipas tij, importet duhet të përdoren “në mënyrë të duhur dhe me mençuri” në rastet kur prodhimi vendas nuk është në gjendje të përmbushë nevojat e tregut.
Khamenei shtoi se nxitja e prodhimit vendas, paralelisht me menaxhimin e importeve dhe çmimeve, mund të ndihmojë në reduktimin gradual të “pikave të errëta” të ekonomisë iraniane, me synimin që ato të eliminohen plotësisht.
Ndërkohë, riali iranian ka shënuar një tjetër rekord negativ ndaj dollarit amerikan. Këtë javë, monedha iraniane ra në mbi 2 milionë rialë për një dollar në tregun e lirë, ndërsa Shtetet e Bashkuara kanë vendosur masa të reja sanksionuese që synojnë të ushtrojnë presion të mëtejshëm mbi ekonominë e Iranit.
