Kongresistja demokrate amerikane Rashida Tlaib kërkoi vendosjen e menjëhershme të një embargoje amerikane të armëve ndaj Izraelit, duke akuzuar qeverinë izraelite për kryerjen e spastrimit etnik ndaj palestinezëve dhe duke kritikuar Washingtonin për vazhdimin e mbështetjes ushtarake, transmeton Anadolu.
“Gjenocidi nuk ka përfunduar kurrë”, tha Tlaib në rrjetin social amerikan X.
Deklaratat e saj erdhën pasi katër palestinezë u vranë dhe të tjerë u plagosën në sulmet izraelite në Qytetin e Gazës dhe në Khan Younis, pavarësisht armëpushimit që hyri në fuqi tetorin e kaluar.
“Qeveria izraelite e aparteidit po kryen spastrim etnik të popullit palestinez, duke përdorur bomba ku shkruhet ‘Made in the USA’. Kjo është e pajustifikueshme”, tha ajo.
“Qeveria jonë duhet të ndalojë financimin e gjenocidit. Embargo armësh tani!”, shtoi Tlaib.
SHBA-ja është kritikuar prej kohësh për mbështetjen që i jep Izraelit në luftën në Rripin e Gazës, ku që nga 7 tetori 2023 janë vrarë më shumë se 73.000 persona, kryesisht gra dhe fëmijë. Në tetor 2025 u arrit një armëpushim, por shkeljet kanë qenë të shpeshta.
Disa ligjvënës amerikanë kanë kërkuar që qeveria e SHBA-së të ndalojë furnizimin me armë të Izraelit dhe e kanë akuzuar atë për bashkëfajësi në luftën e Izraelit në Gaza.
