Spanja ka vendosur kontrolle kufitare për të gjitha udhëtimet ajrore dhe detare nga Italia, duke përshkallëzuar përplasjen mes dy vendeve anëtare të Bashkimit Evropian lidhur me krizën e emigracionit.
Masat kanë hyrë në fuqi në mesnatë dhe do të jenë në fuqi për një muaj, deri më 7 shtator, përveç rastit kur ndryshimi i situatës kërkon shkurtimin ose zgjatjen e tyre.
Vendimi i Madridit vjen një javë pasi Italia vendosi kontrolle të ngjashme ndaj personave që mbërrijnë nga Spanja, pas hyrjes së rreth 78 mijë emigrantëve nga Maroku në enklavën spanjolle të Ceutës.
Qeveria spanjolle i ka kërkuar Romës të heqë kontrollet deri të dielën, por Italia ka refuzuar, duke deklaruar se masat do të qëndrojnë të paktën deri më 15 gusht.
Roma argumenton se kontrollet synojnë të parandalojnë kalimin drejt Italisë të emigrantëve që kanë hyrë në Ceuta. Madridi e ka kundërshtuar këtë arsyetim, duke e cilësuar si të pabazuar, pasi emigrantët që kanë mbërritur në enklavë nuk kanë një rrugë të drejtpërdrejtë për të hyrë në zonën Shengen.
Kontrollet e reja spanjolle përfshijnë verifikimin e pasaportave, shtetësisë dhe vizave për udhëtarët italianë dhe shtetasit e vendeve të treta që mbërrijnë nga Italia.
Përplasja ka vënë përballë kryeministrin socialist spanjoll Pedro Sánchez dhe homologen e tij italiane, Giorgia Meloni, e cila prej kohësh kërkon forcimin e politikave evropiane kundër emigracionit të parregullt.
Ndërkohë, situata në Ceuta mbetet e ndjeshme. Rreth 1,400 të mitur, disa prej tyre fëmijë të vegjël, besohet se ndodhen ende në enklavë.
Shumica e emigrantëve që mbërritën javën e kaluar u kthyen në Marok brenda pak ditësh, ndërsa rreth 100 persona besohet se kanë humbur jetën gjatë përpjekjes për të kaluar kufirin.
Spanja thotë se po monitoron situatën, por deri tani nuk ka njoftuar për një valë të re të pritshme emigrantësh nga Maroku.
