Barcelona ka arsye për t’u shqetësuar për gjendjen fizike të Rodrit, i cili rrezikon të mungojë në përballjen e rëndësishme ndaj Atletico Madridit, të planifikuar më 8 nëntor në “Metropolitano”.
Mesfushori u zëvendësua në pushimin e ndeshjes kundër Aston Villa-s, pasi ndjeu shqetësime në muskujt e pasmë të kofshës. Pas konsultimit me trajnerin Hansi Flick dhe stafin mjekësor, u vendos që ai të mos rrezikonte vazhdimin e takimit.
Futbollisti iu nënshtrua sot ekzaminimeve mjekësore në qendrën stërvitore të klubit, Ciutat Esportiva Joan Gamper, për të përcaktuar shkallën e problemit dhe për të përjashtuar mundësinë e një dëmtimi. Flick konfirmoi shqetësimet pas ndeshjes, duke theksuar se duhej pritur deri në përfundimin e kontrolleve.
Në kampin katalanas shpresojnë që të mos bëhet fjalë për një dëmtim serioz, por pjesëmarrja e Rodrit në sfidën me Atleticon mbetet në pikëpyetje. Përballja në Madrid ka rëndësi të veçantë, pasi është në lojë edhe kreu i renditjes së La Liga-s.
Rodri është shndërruar në një nga lojtarët më të rëndësishëm të skuadrës këtë sezon. Ai ka qenë titullar në 11 nga 15 ndeshjet zyrtare të Barcelonës, duke formuar në shumicën e rasteve dyshen e mesfushës me Pedrin. Vetëm në një rast, në takimin ndaj Betisit, ka luajtur përkrah Gavit.
Hansi Flick dëshiron ta ketë sa më shpejt në dispozicion, por Barcelona nuk ka ndërmend të marrë rreziqe të panevojshme me një prej futbollistëve kryesorë të saj. Vendimi përfundimtar do të varet nga rezultatet e ekzaminimeve dhe reagimi i lojtarit në orët në vijim.
