Qeveria e Zelandës së Re ka njoftuar planet për kufizimin e përdorimit të rrjeteve sociale nga fëmijët nën moshën 16 vjeç, në kuadër të masave për rritjen e sigurisë së të rinjve në internet.
Sipas projektligjit, platformat që konsiderohen me “rrezik të lartë” do të kenë detyrimin të marrin masa të arsyeshme për të verifikuar se përdoruesit janë mbi 16 vjeç. Në procesin e verifikimit mund të përdoren të dhënat ekzistuese të llogarive, teknologjia për vlerësimin e moshës përmes fytyrës, shërbimet e identitetit digjital apo dokumentet zyrtare të identifikimit.
Masat do të përfshinin platforma të mëdha si Facebook, Instagram, Snapchat, TikTok, YouTube dhe X.
Kompanitë do të duhet gjithashtu të kryejnë vlerësime të rregullta mbi rreziqet që platformat e tyre paraqesin për përdoruesit dhe të raportojnë mënyrën se si po përpiqen t’i identifikojnë dhe reduktojnë ato.
Platformat që nuk respektojnë kërkesat e reja mund të përballen me gjoba deri në 10 për qind të të ardhurave të tyre globale.
Ministrja e Arsimit, Erica Stanford, tha se masa synon të mbrojë të rinjtë në internet, të mbështesë prindërit dhe të rrisë përgjegjësinë e kompanive të mëdha teknologjike.
Sipas saj, fëmijët po përballen me përmbajtje të dëmshme, dizajn që krijon varësi dhe teknologji që zhvillohen më shpejt sesa masat mbrojtëse.
Stanford theksoi se përgjegjësia do të jetë e platformave, ndërsa projektligji nuk parashikon ndëshkime për fëmijët, prindërit apo kujdestarët e tyre.
Projektligji duhet ende të miratohet nga Parlamenti i Zelandës së Re.
Zelanda e Re po ndjek kështu një qasje të ngjashme me Australinë, e cila në dhjetor 2025 u bë vendi i parë në botë që kufizoi aksesin e personave nën 16 vjeç në rrjetet sociale.
