Paraqitjet mbresëlënëse të Vozinhas në Kupën e Botës 2026 nuk kaluan pa u vënë re. Portieri me përvojë nga Kepi i Gjelbër ka siguruar një kontratë të rëndësishme financiare, duke vazhduar karrierën te gjiganti kilian Colo-Colo.
40-vjeçari ka firmosur një marrëveshje 18-mujore me klubin kilian. Sipas raportimit të Radio ADN në Kili, Vozinha do të përfitojë 47 milionë peso kiliane në muaj, që përkthehen në rreth 44 mijë euro në muaj, ose 528 mijë euro në vit.
Edhe pse bëhet fjalë për një nga pagat më të larta në kampionatin kilian, Vozinha nuk do të jetë futbollisti më i paguar i Colo-Colo. Ky status vazhdon t’i përkasë mesfushorit veteran Arturo Vidal, i cili përfiton rreth 114 milionë peso kiliane në muaj, ose afro 107 mijë euro.
Sipas medias kiliane, paga e Vozinhas është në të njëjtin nivel me atë të Tomás Alarcón dhe Víctor Felipe Méndez, duke e renditur atë në mesin e futbollistëve më të paguar të skuadrës.
Transferimi i portierit u konfirmua zyrtarisht nga presidenti i Colo-Colo, Aníbal Mosa, pasi klubi nuk arriti të finalizonte transferimin e portierit uruguaian Santiago Mele.
Vozinha ishte një nga surprizat më të mëdha të Kupës së Botës 2026, duke udhëhequr Kombëtaren e Kepit të Gjelbër drejt një ecurie historike në turne. Performancat e tij të shkëlqyera tërhoqën vëmendjen e shumë klubeve, ndërsa në fund ishte Colo-Colo që siguroi firmën e portierit me eksperiencë.
