Presidenti amerikan Donald Trump deklaroi mbrëmë se nuk do të lejojë kurrë që Irani të zotërojë armë bërthamore, gjatë fjalimit të tij për Gjendjen e Unionit.
“Zgjedhja ime është që ky problem të zgjidhet përmes diplomacisë”, tha Trump para dy dhomave të Kongresit amerikan në Uashington.
Ai theksoi se ende nuk ka marrë asnjë zotim nga qeveria iraniane se do të heqë dorë nga programi bërthamor.
Irani prej vitesh këmbëngul se programi i tij bërthamor është vetëm për qëllime civile, por nuk pranon të heqë dorë nga pasurimi i uraniumit, i cili në nivele të larta mund të përdoret për prodhimin e bombave bërthamore.
Shtetet e Bashkuara dhe Irani aktualisht janë në negociata për programin bërthamor iranian, por deri tani nuk ka përparim konkret.
Trump paralajmëroi Teheranin me sulm nëse bisedimet dështojnë, ndërsa Uashingtoni kohët e fundit ka rritur ndjeshëm praninë ushtarake në rajon.
Qershorin e kaluar, Izraeli zhvilloi një luftë 12-ditore kundër Iranit, duke bombarduar objektet kryesore bërthamore iraniane së bashku me SHBA-të. Irani u kundërpërgjigj me sulme masive me raketa ndaj qyteteve izraelite, përfshirë Tel Avivin.
