Triglav Sigurimi Jetësor SHA Shkup, pjesë e Grupacionit Triglav, ka vendosur partneritet me organizatën Women on Boards Adria (WOBA) me qëllim rritjen e përfaqësimit të grave në pozicione drejtuese dhe menaxheriale në industrinë e sigurimeve në Maqedoninë e Veriut.
Kjo nismë vjen në një periudhë kur gratë përbëjnë më shumë se gjysmën e të punësuarve në Grupacionin Triglav dhe mbi 40 për qind të niveleve të para dhe të dyta të menaxhimit. Në organet më të larta drejtuese, gratë janë të përfaqësuara me 25 për qind në Këshillin Mbikëqyrës dhe 20 për qind në Bordin Drejtues – çka tregon përparim të vazhdueshëm dhe përkushtim të qartë ndaj politikës së diversitetit të Grupacionit, e cila synon 33 për qind përfaqësim të gjinisë më pak të përfaqësuar në strukturat drejtuese.
“Bashkëpunimi me Women on Boards Adria përfaqëson një mundësi për të ndërtuar një komunitet biznesi më gjithëpërfshirës dhe për të shkëmbyer përvoja të vlefshme që janë plotësisht në përputhje me misionin e kësaj nisme frymëzuese,” deklaroi Hristrina Xhambazovska Anastasov, Drejtore e Përgjithshme dhe Anëtare Ekzekutive e Bordit të Drejtorëve të Triglav Sigurimi Jetësor SHA Shkup.
Ajo shtoi se gjithëpërfshirja nuk është vetëm një përcaktim politik, por një faktor që ndikon drejtpërdrejt në rezultate.
“Në Triglav Sigurimi Jetësor SHA Shkup, ashtu si në të gjithë Grupacionin Triglav, besojmë se gratë – me aftësitë, vizionin dhe lidershipin e tyre – luajnë një rol kyç në marrjen e vendimeve strategjike dhe në krijimin e zhvillimit të qëndrueshëm. Me këtë partneritet synojmë të hapim perspektiva të reja për gratë në strukturat menaxheriale dhe të tregojmë se forca e vërtetë e një organizate qëndron në larmishmërinë e talenteve, këndvështrimeve dhe ideve,” theksoi Xhambazovska Anastasov.
Bashkëpunimi me Women on Boards Adria do të fokusohet në programe për përgatitjen e grave për anëtarësi në borde drejtues, mentorim në lidership dhe krijimin e rrjeteve profesionale për gratë në sigurime dhe financa. Nisma synon gjithashtu të rrisë ndërgjegjësimin për përfitimet që sjell lidershipi me barazi gjinore – një temë që po bëhet gjithnjë e më e rëndësishme në kushtet e sfidave ekonomike dhe shoqërore bashkëkohore.
“Sigurimet janë mënyrë e menaxhimit të rreziqeve dhe e ndërtimit të besimit – dhe të dyja janë më të forta kur lidershipi është i larmishëm,” u shpreh Biljana Brejtvejt, kryetare e Women on Boards Adria.
Ajo theksoi se ky partneritet ndërtohet mbi progresin e deritanishëm të Triglavit dhe vendos një standard të ri për rajonin.
“Triglav tashmë ka bërë një hap të rëndësishëm përpara, ndërsa me këtë partneritet duam të ecim edhe një hap më tej: të përgatisim më shumë gra për anëtarësi në borde drejtues dhe të tregojmë se balanca gjinore nuk është vetëm çështje drejtësie, por një element thelbësor i qeverisjes së mirë dhe stabilitetit afatgjatë – në sektorin e sigurimeve dhe më gjerë,” shtoi Brejtvejt.
Barazia dhe gjithëpërfshirja janë shtylla themelore të veprimtarisë së Triglavit. Kompania beson se diversiteti nxit inovacionin dhe rritjen, duke siguruar qasje të barabartë në mundësi për të gjithë të punësuarit – pavarësisht gjinisë, prejardhjes apo bindjeve. Duke mbështetur një kulturë të tillë organizative, Triglav Sigurimi Jetësor SHA Shkup synon të arrijë rezultate të qëndrueshme dhe të frymëzojë ndryshime pozitive në shoqëri.
Women on Boards Adria është një nismë rajonale e përkushtuar në rritjen e numrit të grave në pozicione ekzekutive dhe drejtuese në gjithë Evropën Juglindore. Përmes trajnimeve, mentorimit, kërkimeve dhe advokimit, WOBA bashkëpunon me kompani dhe institucione udhëheqëse për të krijuar kuadro lidershipi më të larmishme dhe më të forta që pasqyrojnë realitetin e talenteve në rajon.
Më shumë informacion mbi Women on Boards Adria mund të gjeni në faqen e tyre zyrtare.
