Micotakis ka dy mundësi, ose të sjellë menjëherë për ratifikim marrëveshjet bilaterale me Maqedoninë e Veriut në Parlament ose të pranojë se ai ka humbur kontrollin, jo vetëm në vend, por edhe në partinë e tij, thotë zëdhënësi i SYRIZA-së, Nasos Iliopulos.
Iliopulos komentoi se dje, qeveria e Micotakis njohu Marrëveshjen e Prespës si historike, duke shtuar se tërheqja e termit “historik” e “konfirmon madhësinë e mashtrimit”.
Në të njëjtën kohë, ai pyet Qeverinë për vizitën e djeshme në Selanik të zyrtarëve qeveritarë nga Maqedonia e Veriut, me të cilët u takuan dhe “pse takimet u mbajtën të fshehta?”.
Kryetari i Parlamentit grek, Konstantinos Tasulas javën e kaluar tha se ratifikimet e marrëveshjeve me Maqedoninë e Veriut nuk ishin urgjente, pasi SYRIZA ka akuzuar më parë qeverinë për “shtyrjen e votimit për kohë të pacaktuar” nga frika e pikëpamjeve të ndryshme nga deputetët e Demokracisë së Re.
Projektligjet për “Memorandumin për përshpejtimin e procesit të integrimit të Maqedonisë të Veriut në BE”, “Memorandumin për krijimin e komitetit koordinues për bashkëpunim ekonomik” dhe “Marrëveshja teknike për mbikëqyrjen e FIR Shkup” u paraqitën më 14 dhe 15 shtator në Parlamentin grek.
Tani për tani, nuk ka ndonjë datë specifike për fillimin e procedurave të parashikuara, pra fillimisht të paraqitet në Komisionin për sigurinë kombëtare dhe punët e jashtme dhe më pas të dërgohet në votim në seancë në Parlament.
