Kryetari aktual i Komunës së Karposhit, Stevço Jakimovski, ende nuk ka bërë të ditur nëse do të rikandidojë për mandatin e tij të pestë si udhëheqës i kësaj komune të njohur të Shkupit.
Në një intervistë të dhënë pasditen e sotme për TV24, Jakimovski deklaroi se anketat janë në favor të tij, ndërsa theksoi se banorët e Karposhit i kanë dhënë besimin në tri raste vendimtare, në periudha të vështira politike.
Ai konfirmoi se ka pasur interesim nga LSDM për të mbështetur kandidaturën e tij, por në fund ata kanë vendosur të paraqesin një kandidat të tyre.
“Karposhi ka nevojë për një kryetar të mirë komune,” tha Jakimovski, duke mos dhënë një përgjigje të prerë për ambiciet e tij në zgjedhjet lokale të 19 tetorit.
Në lidhje me partinë e tij, GROM, Jakimovski njoftoi se ajo do të paraqesë një kandidat për Kryetar të Qytetit të Shkupit, por nuk dha detaje shtesë.
Jakimovski paralajmëroi se pret një fushatë zgjedhore të ashpër, të padrejtë dhe me sulme të orkestruara ndaj tij, duke theksuar se ajo ka filluar tashmë.
Ai iu referua edhe vendimit të Gjykatës Penale të Shkupit, e cila para katër muajsh e dënoi me 3 vite e gjysmë burg për keqpërdorim të detyrës zyrtare – vendim që ai e konsideron të motivuar politikisht.
“Ende nuk më është dorëzuar vendimi me shkrim nga gjykata, që ta ankimoj në Gjykatën e Apelit. Besoj se gjykata më e lartë do ta hedhë poshtë këtë vendim,” u shpreh Jakimovski, duke theksuar se i gjithë rasti është pjesë e një fushate të zezë të drejtuar personalisht kundër tij.
Në intervistën për TV24, Jakimovski akuzoi edhe këshilltarët komunalë të VMRO-DPMNE-së se kanë bllokuar me qëllim punën e Këshillit Komunal, duke ndalur projekte të rëndësishme për zhvillimin e Karposhit.
“Ata nuk lejuan realizimin e projekteve strategjike për një komunë që ka qenë model në çdo aspekt. Kjo është pjesë e përpjekjes për të dëmtuar imazhin tim dhe të Karposhit,” u shpreh ai.
Ndërsa dilema për kandidimin e tij të radhës mbetet e hapur, Jakimovski duket se po përgatitet për një betejë të fortë politike në zgjedhjet lokale të tetorit – me sfida të shumta në fushën ligjore, politike dhe institucionale.
