Presidenti i Rusisë, Vladimir Putin, është takuar me nënat e ushtarëve rusë të vrarë në luftën në Ukrainë, duke u thënë se nuk ishte penduar për nisjen e të ashtuquajturit “operacion special ushtarak” dhe se ndante dhimbjen për humbjen e djemve të tyre, shkruan BBC.
Në një takim të incizuar më herët, të transmetuar nga media shtetërore, Putin u ka thënë nënave të ushtarëve që të mos besojnë gjithçka që shohin në televizion ose lexojnë në internet, duke pretenduar se ka shumë lajme të rreme që qarkullojnë.
I ulur me një grup nënash rreth një tavoline me çaj, ëmbëlsira dhe me manaferra të freskëta, Putini ka thënë se ai dhe i gjithë lidershipi rus e kuptojnë dhe ndajnë dhimbjen me ato që humbën djemtë në luftën në Ukrainë.
Putini ka potencuar se nuk ishte penduar për fillimin e asaj që ai e quajti “operacionin special ushtarak” të Rusisë kundër Ukrainës, duke e quajtur luftën një moment vendimtar në të cilin Moska më në fund doli kundër hegjemonisë perëndimore.
Komentet e nënave për presidentin nuk u shfaqën gjatë transmetimit.
