Barcelona ka marrë më në fund ofertën e parë zyrtare nga PSG për Ferran Torres (26 vjeç). Sipas informacioneve të Mundo Deportivo, klubi francez ka ofruar 40 milionë euro fikse për sulmuesin spanjoll, por propozimi është refuzuar nga drejtuesit katalanas, të cilët kërkojnë një shumë më të lartë.
Barcelona e di se Ferran Torres ka arritur tashmë marrëveshje me PSG-në dhe se dëshiron të transferohet sa më shpejt në Paris. Megjithatë, klubi katalanas nuk do t’i japë dritën jeshile operacionit derisa oferta të përmbushë pritshmëritë e tij financiare.
Ferran vjen pas një paraqitjeje të rëndësishme me Spanjën në Botërorin e fituar nga kombëtarja iberike, çka ka ndikuar edhe në vlerën e tij në treg. Barcelona e konsideron sulmuesin një lojtar me vlerë të konsiderueshme dhe nuk dëshiron ta shesë për një shumë që nuk i plotëson kërkesat e klubit.
Në këtë fazë të negociatave, është normale që PSG të ketë nisur me një ofertë më të ulët se ajo që kërkon Barcelona. Klubi francez pritet ta rrisë propozimin në përpjekje për të mbyllur sa më shpejt transferimin e Ferran Torres.
Në të njëjtën kohë, gazetari i njohur Fabrizio Romano ka raportuar se PSG ka bërë një propozim total prej 50 milionë eurosh për transferimin e lojtarit dhe se palët janë pranë një marrëveshjeje verbale.
Megjithatë, burimet e përmendura nga Barcelona insistojnë se, deri në këtë moment, oferta që ka mbërritur zyrtarisht në klub është ajo prej 40 milionë eurosh, dhe përgjigjja e drejtuesve katalanas ka qenë negative.
Kështu, topi është në fushën e PSG-së. Klubi parisien duhet të përmirësojë ofertën nëse dëshiron të bindë Barcelonën për të liruar Ferran Torres, ndërsa vetë lojtari tashmë e ka bërë të qartë dëshirën për të kaluar në Paris.
