Përçarjet në degën e Kërçovës të Lëvizjes BESA kanë marrë hov pas vendimit të Kryesisë së Degës për të shkarkuar nga funksionet partiake deputeten Valbona Adili Emini, Bejtullah Eminin, dhe aktivistë të tjerë partiak.
“Për mosaktivitet dhe shkelje të statutit, shkarkohet kryetari i Degës, Agim Sadiku.
Nga kryesia shkarkohen dhe largohen Bejtulla Emini, Valbona Adili Emini dhe Rexhep Asani”, thuhet në kumtesën e Degës së Kërçovës.
Pas këtyre ngjarjeve ka ardhur reagimi zyrtar nga Lëvizja BESA duke e cilësuar këtë kumtesë si tentativë për destabilizim të procesit të bashkimit të VLEN-it.
“Sqarojmë opinionin publik se Dega e Lëvizjes BESA në Kërçovë, me kryetar Agim Sadikun, sekretar Rexhep Asanin, anëtarët e kryesisë Valbona Adili Emini dhe Bejtulla Eminin, si dhe anëtarësinë e saj, si të gjitha degët e tjera, i nënshtrohet moratoriumit të shpallur të aktiviteteve partiake me qëllim bashkimin e VLEN-it në një subjekt. Këto që shohim sot janë tentativa të motivuara nga jashtë për ta dëmtuar Lëvizjen BESA”, theksohet në kumtesën e Lëvizjes Besa.
