Ministri i Shëndetësisë dhe përfaqësuesi i VLEN-it, Azir Aliu në emisionin “nPodium” në Ora 24.tv ka akuzuar BDI-në se derisa ka qenë në pushtet, provimi në administratë ka qenë vetëm në gjuhën maqedone. Sipas tij, le që janë dhënë provimet në gjuhën maqedone, por kjo garniturë tanimë opozitare, ka qenë pjesë e grupeve që kanë evaluar si profesorë e kështu me radhë.
Deklaratat e ministrit të Shëndetësisë, Azir Aliu, kanë nxitur reagime dhe diskutime në opinionin publik, veçanërisht për faktin se ato u fokusuan në çështje politike që lidhen me periudhën e kaluar të qeverisjes dhe jo në problemet aktuale me të cilat përballet sistemi shëndetësor në vend.
Bexhet Musliu, themeluesi i Agjencisë Zhurnal, në një prononcim të tij, vlerëson se një ministër i Shëndetësisë duhet të përqendrohet para së gjithash në sektorin që drejton, duke ofruar zgjidhje konkrete për sfidat me të cilat përballen qytetarët çdo ditë gjatë marrjes së shërbimeve shëndetësore.
Sipas tij, qytetarët presin të dëgjojnë se çfarë është bërë dhe çfarë planifikohet të bëhet për përmirësimin e kushteve në institucionet publike shëndetësore, veçanërisht në Qendrën Klinike “Nënë Tereza”, e cila vazhdon të jetë institucioni më i madh dhe më i ngarkuar shëndetësor në vend.
Musliu thekson se prej vitesh pacientët ankohen për pritje të gjata për kontrolle specialistike dhe intervenime të caktuara, mungesë të personelit mjekësor dhe infermieror, si dhe për probleme infrastrukturore në disa reparte dhe klinika. Po ashtu, shpesh janë ngritur shqetësime edhe për funksionalitetin e pajisjeve mjekësore dhe nevojën për investime të reja në sistemin publik shëndetësor.
Sipas Musliut, opinioni publik pret që ministri të raportojë për rezultatet konkrete të arritura gjatë mandatit të tij, për masat që janë ndërmarrë për të reduktuar listat e pritjes, për të përmirësuar kushtet e punës së mjekëve dhe infermierëve, si dhe për të parandaluar largimin e kuadrove profesionale nga sektori publik.
Ai vlerëson se debati për çështje politike të së kaluarës nuk duhet të zëvendësojë llogaridhënien për gjendjen aktuale në shëndetësi, pasi qytetarët janë të interesuar para së gjithash për cilësinë e shërbimeve që marrin dhe për funksionimin efikas të institucioneve shëndetësore.
“Qytetarët nuk e vlerësojnë punën e Ministrisë së Shëndetësisë bazuar në akuzat ndaj kundërshtarëve politikë, por në bazë të asaj që përjetojnë në spitale, klinika dhe ambulanca. Prandaj, fokusi duhet të jetë te rezultatet konkrete dhe përmirësimi i kushteve për pacientët”, vlerëson Bexhet Musliu
Sipas tij, shëndetësia mbetet një nga sektorët më të ndjeshëm në vend dhe një nga temat që prek drejtpërdrejt jetën e qytetarëve, prandaj edhe përgjegjësia e institucioneve për të ofruar rezultate është më e madhe se në çdo fushë tjetër.
