Minatorët e Trepçës janë ankuar se ende nuk e kanë marrë pagën e muajit qershor, ndërsa jemi në fund të korrikut.
Kështu ka bërë të ditur Sindikata e Pavarur e Minatorëve të Trepçës teksa ka shprehur shqetësimin për neglizhencën e treguar nga qeveria, ministria dhe bordi i ndërmarrjes.
Në një njoftim në Facebook, Sindikata ka theksuar se interesi për fatin e minierës dhe minatorëve është në nivelin zero, dhe premtimet janë vetëm fjalë boshe.
“Një qasje e tillë refuzuese ndaj ndërmarrjes Trepça Sh.A dhe minatorëve, duke i lënë të njëjtit buzë humnerës dhe duke ia pamundësuar ekzekutimin e pagave gati për dy muaj nën këto kushte të rënda financiare të minatorëve, përbën shqetësim serioz dhe sfidë që kërkon zgjidhje të menjëhershme,” thuhet në njoftimin e Sindikatës.
Sindikata gjithashtu ka paralajmëruar për rrezikun që minatorët mund të kërkojnë zgjidhje tjera ose të migrojnë jashtë vendit, nëse situata vazhdon kështu.
“Fatkeqësisht ndoshta ky edhe është qëllimi dhe dëshira e disave! Jeni duke i përbuzur minierën dhe minatorët, një ditë do i kërkoni!”, thuhet në përfundim të njoftimit.
