Rritja e numrit të përpjekjeve të mbuluara nga Fondi synon pikërisht t’u japë këtyre familjeve më shumë mundësi për të realizuar shtatzëninë përmes procedurave të fekondimit të asistuar biomjekësor
Nga Fondi për Sigurim Shëndetësor bëjnë të ditur se, mbi 1800 kërkesa për IVF në një vit, 237 për përpjekjet e katërta, të pesta dhe të gjashta. Për familjet që prej vitesh përpiqen të bëhen prindër, çdo përpjekje e re për fekondim të asistuar biomjekësor përfaqëson një shpresë të re. Pikërisht për këtë arsye, një nga ndryshimet më të rëndësishme në ushtrimin e kësaj të drejte ishte rritja e numrit të përpjekjeve për IVF në kurriz të Fondit për Sigurim Shëndetësor, nga tre në maksimum prej gjashtë përpjekjesh.
Vetëm një vit pas këtij ndryshimi, të dhënat tregojnë se mundësia e zgjeruar nuk ka mbetur vetëm një e drejtë ligjore, por po shfrytëzohet në praktikë nga të siguruarit. Në periudhën nga 7 gushti 2025 deri më 20 gusht 2026 janë paraqitur dhe shqyrtuar gjithsej 1,883 kërkesa për IVF. Prej tyre, 237 kërkesa kanë qenë për përpjekjen e katërt, të pestë ose të gjashtë, mundësi e cila më parë nuk ekzistonte në kurriz të Fondit.Nga 237 kërkesat, 216 janë për përpjekjen e katërt, 17 për përpjekjen e pestë dhe 4 kërkesa për përpjekjen e gjashtë. Kjo përbën rreth 12.6 për qind të të gjitha kërkesave të shqyrtuara në këtë periudhë dhe tregon se një pjesë e konsiderueshme e familjeve po shfrytëzojnë mundësinë e re për të vazhduar trajtimin edhe pas tre përpjekjeve të mëparshme. Sipas Fondit, pas këtyre shifrave qëndrojnë familje që kanë fituar një mundësi tjetër për të vazhduar aty ku më parë mbështetja e sistemit shëndetësor kishte përfunduar. Rritja e numrit të përpjekjeve të mbuluara nga Fondi synon pikërisht t’u japë këtyre familjeve më shumë mundësi për të realizuar shtatzëninë përmes procedurave të fekondimit të asistuar biomjekësor.
Reforma në këtë fushë nuk është kufizuar vetëm në rritjen e numrit të përpjekjeve. Procedura është thjeshtuar edhe më tej përmes futjes së dorëzimit elektronik të njoftimit për të drejtën e miratuar për IVF. Ndërkohë, afati për paraqitjen e kundërshtimit është zgjatur nga 8 në 15 ditë, duke u dhënë të siguruarve më shumë kohë për të ushtruar të drejtën e tyre. Një tjetër ndryshim ka të bëjë me marrjen e shërbimeve shëndetësore BPO. Personi i siguruar mund t’i marrë këto shërbime në bazë të një njoftimi nga Fondi, pa pasur nevojë për një referim shtesë nga gjinekologu i zgjedhur në kujdesin shëndetësor parësor.
Nga Fondi informojnë gjithashtu se për procedurat IVF të kryera në tetë institucione shëndetësore me të cilat kanë lidhur marrëveshje, gjatë vitit 2025 janë realizuar më shumë se 97.3 milionë denarë. Shifrat e periudhës njëvjeçare tregojnë kështu se zgjerimi i mbulimit financiar për IVF ka krijuar mundësi konkrete për qindra familje që më parë nuk kishin mundësi të vazhdonin trajtimin me mbështetje nga Fondi. Me 237 kërkesa për përpjekjet e katërta, të pesta dhe të gjashta, ndryshimi ligjor tashmë po reflektohet drejtpërdrejt në numrin e familjeve që vazhdojnë të kërkojnë mundësi për t’u bërë prindër.
