Në prag të sezonit kryesor të vjeljes dhe marrjes së prodhimit vendor bujqësor, Qeveria ka miratuar një vendim të rëndësishëm për rishpërndarjen dhe ristrukturimin e mjeteve nga fondet kompensuese. Me ndryshimet e reja ndërhyhet në linjën ekzistuese të kreditimit përmes Bankës së Zhvillimit, me qëllim financimin direkt të blerjes së rrushit të verës të varietetit “vranec” dhe orizit të papërpunuar (arpa).
Sipas ekzekutivit, masa vjen në kohën kur përpunuesit dhe grumbulluesit kanë nevojën më të madhe për kapital të freskët, përpara realizimit të të ardhurave nga shitja finale.
Me këtë hap krijohet kornizë e sigurt financiare, që garanton se i gjithë prodhimi i dorëzuar do të paguhet brenda afateve të përcaktuara me ligj.
Qeveria ka siguruar mjetet nga fondet e disponueshme, ndërsa kryeministri dhe institucionet kompetente kanë përcaktuar shumat e sakta për dy kulturat strategjike:
“Aktivizohen mjetet e disponueshme nga linja ekzistuese e kreditimit dhe fondet e lira të administruara nga Banka e Zhvillimit. Shuma totale e disponueshme është 793.481.723 denarë, ose rreth 10,1 milionë euro. Prej tyre, 240 milionë denarë janë të destinuara për blerjen e orizit të papërpunuar, ndërsa 553.481.723 denarë për blerjen e rrushit të verës ‘vranec’.”
Kush mund të aplikojë?
Kompani të interesuara dhe grumbullues do të mund të aplikojnë sipas parimit “i pari ardhur, i pari i shërbyer”, me pragje të përcaktuara të kreditimit sipas sektorit bujqësor.
Parametrat financiarë dhe afatet e kreditimit
Institucionet qeveritare publikuan detajet e skemës së re të financimit:
Kredia maksimale për blerjen e “vranecit”: deri në 130 milionë denarë
Kredia maksimale për orizin e papërpunuar: deri në 30 milionë denarë
Afati i shlyerjes:
deri në 6 muaj për orizin
deri në 9 muaj për rrushin
Grejs‑periudha: deri në 3 muaj për të dyja kategoritë
Shlyerja: në këste tremujore
Norma e interesit: fikse, 1% në vit
Pa provizion të njëhershëm për administrimin e kredisë
Masa synon të sigurojë likuiditet të mjaftueshëm për grumbulluesit dhe përpunuesit, duke garantuar pagesë të rregullt dhe të plotë për prodhuesit bujqësorë.
