Qytetarët e Maqedonisë së Veriut të jenë optimist dhe shpresues se gjendja do të përmirësohet në vend kjo është shumë e vështirë, pasi dita ditës po dëshmohet në forma të ndryshme se kemi të bëjmë me një vend që nuk është fare i qëndrueshme dhe në këtë formë nuk mund të garantojë as jetë stabile për qytetarët. E fundit që krijoi debat të madh brenda vendit ishte një masë simbolike e Ministrisë së Ekonomisë që çmimi i bukës të ngrihet në 33 denarë, por jo të gjithë furrtarët u pajtuan me këtë masë. Prandaj, disa ditë u krijua panik dhe frikë te qytetarët sepse në raftet e shitoreve nuk kishte bukë. Ky ishte përshkrimi më adekuat i gjendjes në vend që është e vështirë të sigurosh bukën e gojës, kjo mbase në mënyrë metaforike, por që disa ditë nuk ishte metaforë por ishte gjendje reale praktike. Kjo përshkak të mungesës së përgjegjësisë së institucioneve përgjegjëse, pasi është dashur në mënyrë të vazhdueshme të ndihmojë prodhuesit vendor, por kjo nuk ka ndodhur. Prandaj, edhe vendi vështirë të dalë nga kriza e thelluar ekonomike. Nuk është e mjaftueshme masa për të ngrirë vetëm çmimin e bukës, sepse edhe çmimet e produkteve tjera bazë janë në stratosferë, shkruan Zhurnal.
Në Maqedoninë e Veriut mbetesh edhe pa bukë –
Maqedonia e Veriut është shtet në të cilin mund të mbetesh edhe pa bukë, kjo u dëshmua javën e kaluar. Që si pasojë e një vendimi të Ministrisë së Ekonomisë furrtarët u revoltuan dhe për disa ditë nuk prodhuan bukë.
Por, më vonë këta bukëpjekës u penduan dhe u pajtuan me ngrirjen e çmimit të bukës prej 33 denarësh, kështu që vazhduan me prodhimin e bukëve me të njëjtin avaz sikurse para se të futet ky vendim në fuqi.
Madje, disa prej prodhuesve kishin ulur çmimin e bukës edhe në 23 denarë. Ditëve të fundit, siç njofton KlanM, pas vendimit të Qeverisë për ngrirje të çmimit të bukës, ka pasur tensione mes Qeverisë dhe industrisë së bukëpjekësve, të cilët nuk e pranuan mirë këtë vendim dhe një pjesë e tyre disa ditë nuk prodhuan bukë të bardhë, në shenjë proteste. Autoritetet akuzuan bukëpjekësit se përfitojnë në dëm të qytetarëve dhe paralajmëruar dënime ndaj atyre që nuk i binden vendimit të Qeverisë.
Çmimi i bukës përplasi edhe partitë politike –
Kjo masë, ka përplasur edhe partitë politike. Partia në pushtet, LSDM përmes një komunikate, ka lavdëruar Qeverinë, duke thënë se po mbron interesin e qytetarëve dhe nuk po lejon që dikush të përfitojë në kurriz të tyre.
“Me vendimin për çmimin e bukës prej 33 denarë mbrojmë qytetarin dhe standardin. Duke marrë parasysh çmimin e privilegjuar të energjisë elektrike, çmimin e grurit, gazit natyror dhe derivateve të naftës, çmimi prej 33 denarë është korrekte dhe në të përfshihet fitimi i bukëpjekësve. Shqyrtojmë opsione për “ngrirjen” edhe të produketeve tjera themelore” – tha Sanela Shkrijelj, deputete e LSDM-së
Ndërkohë, për VMRO – DPMNE-në opozitare, veprimet e fundit të pushtetit në këtë drejtim, janë hipokrite.
“Është zgjidhje ad-hoc, praktikisht sot për nesër, nuk është zgjidhje afatgjate që mund të sigurojë çmim të pranueshëm për qytetarët. Ne sot, fatkeqësisht, thyejmë rekorde për inflacionin, dyfish më të lartë se në BE, nuk kemi politika ekonomike, bëjnë PR duke u fotografuar nëpër markete me dy copë bukë kryeministri dhe ministrat tjerë, në vend që ta zgjidhin problemin” – tha Hristijan Mickoski, VMRO-DPMNE.
Nuk mjafton vetëm ngrirja e çmimit të bukës, nevojiten edhe çmimet e produkteve tjera të ngrihen –
Ajo që është e nevojshme në këtë kohë krize është ulja dhe ngrirja e çmimeve të paktën të produkteve bazë, në mënyrë që qytetarët ta kenë më të lehtë të përballen me krizën dhe ta tejkalojnë në mënyrë më të lehtë, në të kundërtën nuk mund t’ia dalin.
Ministri i Ekonomisë, Kreshnik Bekteshi paralajmëroi se, po bëhen analiza për ngrirje të çmimeve edhe për produkte të tjera bazë. Sipas paralajmërimeve, pritet ulje e çmimeve të pastave dhe produkteve qumështore. Por, për këtë do të sjellët vendim deri në fund të javës së ardhshme.
Prandaj, kur po flasim për një situatë që çmimi bukës bëhet temë diskutimi me javë të tëra, kjo flet qartazi edhe për derexhenë në të cilën ka rënë vendi. Në vend se të flitet për investime, zhvillim e progres flitet si të sigurohet për ditët në vijim bukë produktin bazë për qytetarët. Kjo mbase tregon edhe arsyen që pse qytetarë të shumtë janë të dëshpëruar dhe të zhgënjyer nga ky keq-menaxhim i vendit. /Zhurnal.mk
