Kryeministri i Kosovës, Albin Kurti, ka deklaruar se nuk mund të arrihet zhvillimi ekonomik nëse nuk i japin përkrahje sektorit privat në vend dhe nëse kjo sferë nuk mbetet priritet.
Kurti gjatë takimit me komunitetin e biznesit të Prishtinës, në kuadër të fushatës informuese “Ditët e biznesit Kosovarë” të organizuar nga Ministria e Industrisë, Ndërmarrësisë dhe Tregtisë (MINT), tha se qeverisja e mirëfilltë, zhvillimi ekonomik dhe mirëqenia e qytetarëve janë vizion i qeverisë që e udhëheqë ai dhe partia e tij.
“Qeverisja e mirëfilltë, zhvillimi ekonomik dhe mirëqenia e qytetarëve janë vizioni i qeverisë tonë. Në programin qeverisës është përmirësimi i konkurecës së ndërmarrjeve. Dialogu i vazhdueshëm mes nesh është i domosdoshëm që vizionin e programin ta kthejmë të realizueshëm dhe të qasshëm. Zhvillimi ekonomik nuk mund të arrihet nëse nuk i japim përkrahje sektorit privat”, tha ai.
Albin Kurti para sektorit privat tha se qeveria e Kosovës është e përkushtuar për të ndihmuar një sektor privat të qëndrueshëm.
“Sipas vlerësimit të BQK-së ka një rritje ekonomike prej 9.9 për qind të bruto produktit vendor, krahasuar me një vit të ardhurat janë shtuar për 33 për qind, eksportet me 68 për qind, ndërsa numri i të punësuarve është rritur”, tha Kurti.
Ministrja e Industrisë, Ndërmarrësisë dhe Tregtisë, Rozeta Hajdari, tha se është tejet e rëndësishme dialogu në mes qeverisë dhe bizneseve private në Kosovë.
Ajo ka përmendur se si qeveri kanë ndërmarrë një sërë nismash ligjore për t’i dalë në ndihmë bizneseve në vend.