Sipas ish-sekretarit të përgjithshëm të NATO-s, George Robertson, presidenti rus, Vladimir Putin, dëshironte që ta anëtarësonte vendin e tij në aleancë, por duke iu shmangur procesit të zakonshëm të aplikimit dhe për të mos qëndruar në linjë “me shumë shtete që s’kanë peshë”.
Ish-sekretari britanik i Mbrojtjes, i cili e ka udhëhequr NATO-n në periudhën 1999 – 2004, tha se Putini e kishte bërë të qartë në takimin e tyre të parë se ai dëshironte që Rusia të ishte pjesë e Evropës Perëndimore. “Ata donin që të ishin pjesë e atij perëndimi të sigurt, stabil e të begatë, që Rusia ishte jashtë tij në atë kohë”, tha Robertson.
Ai kujtoi një takim të hershëm me Putinin, i cili u bë president i Rusisë në vitin 2000. “Putini tha: Kur do të na ftoni për t’iu bashkuar NATO-s? Unë thashë: Ne nuk i ftojmë njerëzit për t’iu bashkuar NATO-s, ata aplikojnë për t’iu bashkuar NATO-s. Dhe ai tha: Ne nuk do të qëndrojmë në linjë me shumë shtete që nuk kanë peshë”, rrëfeu ish-zyrtari i lartë britanik.
Ky përshkrim përputhet me deklaratën e Putinit në një intervistë për BBC-në para se të inaugurohej si president para më shumë se 21 vjetëve. Putini kishte thënë se nuk e përjashtonte anëtarësimin në NATO, “nëse dhe kur qëndrimet e Rusisë merren parasysh si të atyre që janë partnerë të barabartë”.
Ai kishte thënë se e ka të vështirë që ta imagjinojë NATO-n si armike. “Rusia është pjesë e kulturës evropiane dhe unë nuk mund ta imagjinoj vendin tim në izolim nga Evropa dhe nga ajo që shpesh e quajmë botë e civilizuar”, kishte thënë Putini.
