E ardhmja e kombëtares italiane mund të ketë një kthesë të madhe dhe të flasë katalanisht. Hipoteza e Pep Guardiolës si trajneri i ri i “Azzurrëve” nuk konsiderohet më vetëm një ide e largët, por një mundësi që po merr gjithnjë e më shumë formë falë punës së Paolo Maldinit dhe Leonardos, të cilët janë angazhuar për të projektuar një rilindje të futbollit italian.
Pengesa kryesore për realizimin e këtij skenari mbetet ana ekonomike. Pas viteve të suksesshme te Manchester City, ku Guardiola kishte një nga pagat më të larta në futbollin botëror, mbi 20 milionë euro në sezon, një marrëveshje e tillë do të ishte përtej mundësive financiare të Federatës Italiane të Futbollit (FIGC).
Megjithatë, sipas raportimeve të La Gazzetta dello Sport, negociata mund të bazohet në faktorë të tjerë. Guardiola nuk e ka fshehur asnjëherë dëshirën për të drejtuar një kombëtare dhe sfida e Italisë mund ta tërheqë për shkak të prestigjit dhe mundësisë për të ndërtuar një projekt të ri.
Në këtë situatë, marrëdhënia personale dhe vlerësimi i ndërsjellë mes Guardiolës, Maldinit dhe Leonardos mund të luajë një rol vendimtar. Ideja do të ishte që trajneri spanjoll të bindet përmes një projekti ambicioz, ku fokusi nuk do të ishte vetëm financiar, por rindërtimi i kombëtares italiane dhe rikthimi i saj në elitën e futbollit botëror.
Një element tjetër që e bën këtë mundësi edhe më interesante është përballja e mundshme me një tjetër trajner të madh të brezit të tij, Jürgen Klopp, i cili raportohet se ka marrë drejtimin e kombëtares së Gjermanisë. Një rivalitet i ri mes dy prej teknikëve më të suksesshëm të 20 viteve të fundit, këtë herë në pankinat e dy përfaqësueseve historike, do të ishte një nga duelet më tërheqëse të futbollit ndërkombëtar.
Për Italinë, ardhja e Guardiolës do të nënkuptonte hapjen e një epoke të re, me synimin për ta rikthyer skuadrën e kaltër në nivelet më të larta pas viteve të vështira dhe mungesës në dy Botërorët e fundit.
