GTA VI rikthehet me pamje të re: Kur publikohet traileri i shumëpritur?
Lojtarët do të kenë mundësinë të shohin më nga afër titullin më të shumëpritur të industrisë së lojërave prej vitesh, me një pamje të zgjeruar të videolojës së ardhshme aksion “Grand Theft Auto VI“, të enjten.
Traileri i zgjeruar i lojës, vetëm i treti që nga publikimi i teaser-it të parë në vitin 2023 do të publikohet në Netflix më 27 gusht, në orën 15:00 ET (19:00 GMT), njofton zhvilluesi Rockstar Games.
Pas më shumë se një dekade pritjeje dhe disa shtyrjesh, pjesa e radhës e serisë kult pritet të publikohet më 19 nëntor dhe raportohet se do të jetë produkti argëtues më i kushtueshëm i prodhuar ndonjëherë.
Abonentët e Netflix janë në një avantazh të vogël, pasi pamjet fillimisht do të jenë ekskluzive për platformën. Vetëm gjashtë orë më vonë, traileri do të bëhet publik për të gjithë fansat në kanalin e Rockstar në YouTube.
Njoftimi se traileri do të publikohet në Netflix lë shumë pyetje pa përgjigje, duke premtuar vetëm një “pamje të zgjeruar“ të lojës. Rockstar nuk ka konfirmuar kohëzgjatjen e pamjeve, as nëse ato tregojnë gameplay.
Entuziazmi rreth trailerit është zbutur disi nga rrjedhja e vazhdueshme e pamjeve, të cilat u kanë dhënë fansave një vështrim të pronësisë intelektuale që është mbajtur tepër sekrete. Rrjedhjet e deritanishme kanë treguar një lojtar duke drejtuar një avion, duke ngarë një motoçikletë për t’u larguar nga policia dhe duke goditur me thikë njerëz të pastrehë në një nënkalim.
Me një buxhet të vlerësuar shumë mbi 1 miliard dollarë, „GTA VI“ pritet të bëhet produkti argëtues më i shtrenjtë i prodhuar ndonjëherë. Megjithatë, ai po rezulton gjithashtu i kushtueshëm për lojtarët.
Me çmime deri në 100 dollarë, seria e lojërave kult po vendos një standard të ri për çmimet e lojërave premium, duke e çuar çmimin mbi 70 dollarët që zakonisht janë kërkuar për lojërat më të nivelit të lartë të viteve të fundit. Kufiri i sipërm prej 70 dollarësh ishte thyer më parë, megjithatë, kur Nintendo vendosi një çmim prej 80 dollarësh për lojën e saj kryesore për konsolën Switch 2, “Mario Kart World“, në qershor 2025. Porositë paraprake për GTA VI janë të disponueshme që nga fundi i qershorit.
“Grand Theft Auto“ është një nga seritë më të njohura të videolojërave në botë dhe u publikua për herë të parë në vitin 1997. Pjesa më e fundit është vendosur në një version imagjinar të qytetit amerikan të Miami-t. Paraardhësja e saj ka shitur më shumë se 200 milionë kopje që nga viti 2013.
Traileri i publikuar deri më tani përmban ndjekje makinash me shpejtësi të lartë, skafe të shpejta, plazhe, armë dhe krokodilë. “GTA VI“ është shtyrë dy herë, duke kaluar nga objektivi fillestar i vjeshtës së vitit 2025 dhe më pas nga maji 2026, përpara se të caktohej përfundimisht data e publikimit në nëntor./DPA News
