Federata e Futbollit e Afrikës së Jugut (SAFA) ka mohuar zërat se Hugo Broos ka dhënë dorëheqjen nga posti i trajnerit të kombëtares, duke u dhënë fund spekulimeve që e lidhnin teknikun belg me një largim pas përfundimit të Kupës së Botës 2026.
Pas eliminimit të “Bafana Bafana” nga turneu, në medie nisën të qarkullonin raportime për një ndarje të mundshme mes trajnerit 74-vjeçar dhe kombëtares. Megjithatë, SAFA vendosi të reagonte zyrtarisht për të sqaruar situatën.
“Në Shoqatën e Futbollit të Afrikës së Jugut (SAFA) mohojmë zërat se trajneri Hugo Broos ka lënë postin e selektorit të kombëtares së meshkujve të Afrikës së Jugut. Broos vazhdon të jetë trajneri i Bafana Bafana dhe informacionet që pretendojnë të kundërtën janë plotësisht të pavërteta”, thuhet në komunikatën e federatës.
Aktualisht, Broos ndodhet duke pushuar në Belgjikë, një udhëtim që e nisi menjëherë pasi u kthye në Afrikën e Jugut së bashku me skuadrën pas eliminimit nga Botërori.
Sipas planit të federatës, trajneri belg nuk po përgatit një largim përfundimtar, por pritet të rikthehet në Afrikën e Jugut gjatë ditëve të fundit të korrikut për të rifilluar punën dhe për të përgatitur ekipin për sfidat e ardhshme.
Broos ka qenë një figurë e rëndësishme në rritjen e kombëtares së Afrikës së Jugut. Nën drejtimin e tij, “Bafana Bafana” realizoi një paraqitje historike në Botërorin 2026, duke arritur për herë të parë në fazën me eliminim direkt të një Kupe Bote.
