Vendet evropiane regjistruan më shumë se 10.000 vdekje shtesë gjatë një vale rekord të të nxehtit që goditi Evropën Perëndimore në fund të qershorit, tregojnë të dhënat zyrtare.
Shkencëtarët theksojnë se vala e të nxehtit në fund të qershorit do të kishte qenë “pothuajse e pamundur” pa ndryshimet klimatike të shkaktuara nga njeriu, të cilat po i bën valët e të nxehtit më të shpeshta dhe intensive.
Të dhënat, të përpiluara nga statistikat kombëtare të vdekshmërisë në 27 vende anëtare evropiane, përfshijnë vdekje shtesë nga të gjitha shkaqet, jo vetëm të lidhura me të nxehtin, gjatë javës së 22-28 qershorit, kur vala e të nxehtit arriti kulmin në Francë, Spanjë, Britani të Madhe dhe vende të tjera.
Numri i përgjithshëm i vdekjeve në të njëjtat vende evropiane gjatë tetë javëve paraprake ishte mesatarisht rreth 500 vdekje në javë nën nivelet normale. Të dhënat e EuroMOMO-s mund të ndryshojnë në javët e ardhshme, siç do të merren të dhëna të reja.
Vala ekstreme e të nxehtit në fund të qershorit ndërpreu furnizimin me energji elektrike, mbylli shkollat dhe theu rekorde për temperaturat në Francë, Spanjë dhe Mbretërinë e Bashkuar.
EuroMOMO nuk publikon të dhëna mbi vdekshmërinë e tepërt për vendet individuale, por thotë se Franca dhe Belgjika ishin të vetmet dy vende evropiane që regjistruan “vdekshmëri shumë të lartë të tepërt” në javën e fundit të qershorit.
Numri i lartë i vdekjeve në Belgjikë ishte më i larti gjatë çdo vale të të nxehtit të regjistruar që nga viti 2000, sipas institutit belg për shëndet publik “Siensano”.
Një studim i veçantë shkencor i publikuar sot vlerëson se 2.700 njerëz vdiqën si pasojë e të nxehtit gjatë valëve të të nxehtit të majit dhe qershorit në Angli dhe Uells.
