Southampton është përjashtuar nga “play-off”-et e Championship-it pas një vendimi disiplinor të EFL, pasi klubi pranoi shkelje të rregullave përmes filmimeve të paautorizuara gjatë stërvitjeve të kundërshtarëve.
Në vendimin zyrtar të EFL thuhet se shkeljet lidhen me filmimin e paautorizuar të seancave stërvitore të klubeve të tjera, përfshirë rastet ndaj Middlesbrough, si edhe ndaj Oxford United dhe Ipswich Town.
Middlesbrough e ka mirëpritur vendimin, duke e cilësuar atë si një mesazh të qartë për integritetin sportiv dhe sjelljen në futboll.
Ndërkohë, nga kampi i Southamptonit thuhet se klubi e konsideron dënimin të tepruar dhe tashmë ka nisur procesin e apelimit, duke pretenduar se vendimi është ndikuar nga rrjedhjet në media gjatë hetimit.
EFL ka konfirmuar se Southampton ka të drejtë ankimi dhe se palët po punojnë për shqyrtimin e mundshëm të apelimit në ditët në vijim, gjë që mund të ndikojë edhe në kalendarin e finales së “play-off”-it në Wembley.
