Ish-drejtori i Policisë së Kosovës, tash deputet i PDK-së, Rashit Çalaj, ka thënë se drejtori i dorëhequr i Policisë së Kosovës, në veri nuk duhet të kthehet më në atë vend të punës.
Çalaj, tha se kjo nuk duhet të bëhet për shkak të daljes së tij publike duke i kundërshtuar urdhërata e Policisë së Kosovës.
Ai tha se madje ka vend që këta dy persona të ndiqen edhe penalisht.
Ndërkaq, për policët e thjeshtë, sipas deputetit të PDK-së ka hapësirë ligjore që të kthehen në punë, për shkak të arsyeve që i kanë shkruar në letër-dorëheqjet e tyre.
Po ashtu, deputeti i PDK-së, tha se Ushtruesi i Detyrës, së Drejtorit të Policisë së Kosovës, nuk i ka pranuar dorëheqjet e policëve në veri.
“Kurse për punëtorët e thjeshtë varen se çfarë kanë shkruar në dorëheqjen e tyre. Me informatat që i kam drejtori nuk i ka aprovuar dorëheqjet, për policët e thjeshtë ka vend. Me informatat që i kam, dorëheqjet i kanë bërë kanë shkruar për arsye personale apo morale. Nuk kanë shkruar diçka më shumë që do të binte ndesh”, ka thënë ai.
Çalaj, tutje tha se çështja e lojalitetit të policëve serb në Policinë e Kosovës, gjithmonë ka qenë e kontestueshme.
