Kryetari i Bashkimit Demokratik për Integrim (BDI), Ali Ahmeti, ka reaguar ashpër ndaj deklaratës së një ministreje të Serbisë, e cila tha se, po të ishte në vend të Sllobodan Millosheviqit, do ta kishte spastruar etnikisht Kosovën në vitin 1998, shkruan Top24
Përmes një reagimi publik, Ahmeti e cilësoi deklaratën si tronditëse, çnjerëzore dhe të papranueshme, duke theksuar se një qëndrim i tillë përbën jo vetëm fyerje për viktimat e luftës në Kosovë, por edhe pasqyrim të një mentaliteti të frymëzuar nga politika kriminale e Sllobodan Millosheviqit.
Sipas tij, të flasësh sot për spastrim etnik si alternativë politike, pas masakrave, vrasjeve të civilëve, varrezave masive dhe krimeve të dokumentuara në Kosovë, është dëshmi e një mendësie të rrezikshme, që bie ndesh me vlerat njerëzore, demokratike dhe evropiane.
Ahmeti theksoi se mohimi apo glorifikimi i politikave gjenocidale nuk mund të ketë vend në shekullin XXI dhe se deklarata të tilla duhet të dënohen pa asnjë hezitim.
Në reagimin e tij, kreu i BDI-së rikujtoi se historia tashmë ka dhënë verdiktin ndaj politikave të Millosheviqit, duke nënvizuar se pikërisht përballë këtij mentaliteti u ngrit rezistenca e popullit të Kosovës, e cila u kurorëzua me Ushtrinë Çlirimtare të Kosovës (UÇK).
“Në krah të aleatëve tanë ndërkombëtarë, UÇK-ja solli lirinë dhe çlirimin e Kosovës. Ata që edhe sot ëndërrojnë spastrim etnik duhet ta dinë se ideologjitë e urrejtjes gjithmonë përfundojnë në bankën e historisë, ndërsa liria dhe e drejta triumfojnë”, theksoi Ahmeti në fund të reagimit të tij.
