Zgjedhjet parlamentare në Izrael janë mbyllur pa një fitues të qartë, sipas exit poll-eve të publikuara nga transmetuesit izraelitë. As kryeministri veteran Benjamin Netanyahu dhe as ish-shefi i ushtrisë Gadi Eisenkot nuk duket se kanë siguruar shumicën e nevojshme në parlamentin prej 120 vendesh.
Sipas projeksioneve të dy televizioneve izraelite, partia Yashar e Eisenkot dhe tri parti të tjera të opozitës hebraike, pjesë e të ashtuquajturit “Blloku i Ndryshimit”, pritet të fitojnë 51 vende në Knesset.
Të njëjtin numër mandatesh parashikohet të sigurojnë edhe Likud i Netanyahut, së bashku me aleatët e tij të ekstremit të djathtë dhe partitë ultraortodokse hebraike.
Ndërkohë, një sondazh i publikuar nga një transmetues i tretë i jep një epërsi prej tri vendesh kampit të Netanyahut, duke reflektuar pasigurinë që shoqëron rezultatet paraprake.
Partitë arab mund të përcaktojnë shumicën
Vëmendja është përqendruar te partitë arabe, të cilat, sipas exit poll-eve, mund të sigurojnë 18 ose 19 vende në parlament, një rezultat rekord.
Roli i tyre mund të jetë vendimtar në përcaktimin e shumicës parlamentare dhe në negociatat për formimin e qeverisë së ardhshme. Megjithatë, ndikimi i tyre do të varet nga qëndrimet politike të partive dhe nga gatishmëria e kampeve rivale për të bashkëpunuar me to.
Pjesëmarrja më e lartë në dekada
Një tjetër element i rëndësishëm i këtyre zgjedhjeve ishte pjesëmarrja e lartë e qytetarëve.
Sipas Komisionit Qendror të Zgjedhjeve në Izrael, deri në mbylljen e qendrave të votimit, në orën 22:00 sipas orës lokale, pjesëmarrja kishte arritur në 77.7 për qind.
Ky është niveli më i lartë i regjistruar në atë orar që nga viti 1999, duke shënuar një pjesëmarrje të pazakontë në dekadat e fundit.
Rezultatet përfundimtare pritet të qartësojnë raportin e forcave në Knesset, ndërsa negociatat mes partive do të përcaktojnë se cili kamp do të arrijë të sigurojë mbështetjen e nevojshme për formimin e qeverisë së re.
