Kryetari i Komunës së Çairit dhe bashkëkryetari i VLEN-it, Izet Mexhiti, ka pritur në një vizitë vëllazërore Bekim Jasharin, nga familja heroike Jashari. Gjatë takimit, ata kanë bashkëbiseduar për historinë kombëtare, të ardhmen e shqiptarëve dhe zhvillimet në fushën e arsimit.
Në kuadër të vizitës, Mexhiti dhe Jashari kanë vizituar edhe kampusin e ri të Universitetit “Nënë Tereza” në Shkup, të cilin Mexhiti e cilësoi si një projekt të rëndësishëm për arsimin shqip në Maqedoninë e Veriut.
“Gjithmonë nder të takohemi e bisedojmë me Bekimin e familjes heroike Jashari.
Në vizitën vëllazërore në Komunën e Çairit, folëm për historinë heroike, të tashmen e planeve të mëdha dhe të ardhmen e ndritur të shqiptarëve.
Vizita e përbashkët në kampusin e ri të Universitetit “Nënë Tereza”, një projekt historik në qendrën e Shkupit, është e domosdoshme, sidomos me Bekimin e Hamzës së familjes Jashari.
Ishte kënaqësi të bashkëbisedojmë rreth investimit më të madh në historinë e arsimit shqip në Maqedoni të Veriut.
Shqipja, shqiptari dhe Shkupi janë historikisht të lidhur, ndërsa tashmë e ardhmja ka një dimension të ri kulturor e kombëtar.
E falënderoj Bekimin për vizitën vëllazërore, ndërsa dera e Komunës së Çairit është gjithnjë e hapur për familjen që është busulla e shqiptarisë”, ka shkruar Mexhiti.
Izet Mexhiti pret Bekim Jasharin në Çair, vizitojnë kampusin e ri të Universitetit “Nënë Tereza”
