Kryeministri i Maqedonisë së Veriut, Hristijan Mickoski, në fjalimin me rastin e 11 Tetorit, Ditës së Kryengritjes Popullore, bëri thirrje për unitet kombëtar, zhvillim ekonomik dhe forcimin e shtetit, duke theksuar se brezi i sotëm ka përgjegjësinë t’u lërë gjeneratave të ardhshme një vend më të zhvilluar dhe më të qëndrueshëm.
Mickoski kujtoi sakrificën e luftëtarëve që 85 vjet më parë u ngritën kundër pushtuesit fashist në Prilep dhe Kumanovë, duke theksuar se liria e sotme është rezultat i guximit dhe përkushtimit të paraardhësve.
„Maqedonia është më e madhe se çdo brez politik“, deklaroi Mickoski, duke nënvizuar se interesi i shtetit duhet të jetë mbi interesat personale dhe partiake.
Ai theksoi se vendi duhet të tejkalojë ndasitë politike dhe të përqendrohet në reforma, investime, institucione funksionale dhe krijimin e kushteve më të mira për qytetarët, veçanërisht për të rinjtë.
Duke folur për ekonominë, kryeministri përmendi rritjen e Prodhimit të Brendshëm Bruto prej 4,3 për qind në tremujorin e dytë të vitit 2026, si dhe rritjen e eksporteve me 8,7 për qind gjatë tetë muajve të parë të vitit.
Ai bëri të ditur se paga mesatare neto në korrik arriti në 48.499 denarë, ndërsa synimi i Qeverisë është që deri në fund të mandatit ajo të afrohet ose të kalojë 1.000 euro.
Megjithatë, Mickoski pranoi se një pjesë e familjeve vazhdojnë të përballen me vështirësi për të mbuluar shpenzimet mujore, duke theksuar se rritja ekonomike duhet të reflektohet drejtpërdrejt në standardin jetësor të qytetarëve.
„Suksesi i vërtetë do të jetë kur rritja ekonomike të ndihet në çdo shtëpi“, u shpreh ai.
Një pjesë të fjalimit Mickoski ia kushtoi edhe marrëdhënieve me Bullgarinë dhe procesit të integrimit evropian.
Ai deklaroi se Maqedonia e Veriut dëshiron të ecë drejt Bashkimit Evropian, por pa hequr dorë nga identiteti, gjuha dhe historia maqedonase.
„Dinjiteti nuk është objekt negociatash. Ne duam një të ardhme evropiane, aleanca të forta dhe miqësi, por me kokën lart“, tha Mickoski.
Sipas tij, marrëdhëniet e mira fqinjësore duhet të ndërtohen mbi respektin e ndërsjellë, ndërsa dallimet historike nuk duhet të shndërrohen në pengesë për bashkëpunimin.
Kryeministri theksoi gjithashtu se vendit i nevojiten reforma të thella, investime në infrastrukturë, arsim modern, sistem shëndetësor më i fuqishëm dhe institucione që do t’u shërbejnë qytetarëve.
Në përfundim të fjalimit, Mickoski rikujtoi përgjegjësinë e brezit aktual ndaj të ardhmes së vendit, duke theksuar se liria dhe pavarësia e trashëguar duhet të shndërrohen në zhvillim dhe mirëqenie.
„Paraardhësit tanë na e lanë lirinë. Prindërit tanë na e lanë pavarësinë. Ndërsa ne, fëmijëve tanë, duhet t’u lëmë një shtet të suksesshëm“, përfundoi Mickoski.
