Ministri i Drejtësisë, Jeton Shasivari, sot mori pjesë në tryezën e rrumbullakët me temë “Avancimi i funksionit hulumtues-analitik në partitë politike – përvojat juridike dhe krahasuese”.
Shasivari theksoi se Qendrat hulumtuese – analitike të partive (QHAP) kanë rol të rëndësishëm në avancimin e cilësisë së partive politike, debatit publik dhe proceseve demokratike.
“PIAC duhet të jenë vendet ku politika ballafaqohet me faktet, ndërsa të dhënat dhe analizat përdoren që vendimet të jenë më të mira”, tha Shasivari.
Ai theksoi se përdorimi i mjeteve publike për financimin e QHAP-ve sjell me vete edhe përgjegjësi publike, veçanërisht në lidhje me cilësinë e hulumtimeve, analizave dhe rekomandimeve që dalin prej tyre.
„Mjetet publike duhet të prodhojnë vlerë publike. Këto mjete janë të dedikuara për hulumtim, analizë, zhvillim të politikave dhe ndërtim të kapaciteteve profesionale. Prandaj, është e nevojshme të kemi jo vetëm rregulla për atë se si shpenzohen mjetet, por edhe kulturë të përgjegjësisë se çfarë prodhojnë këto mjete. Cilat hulumtime janë realizuar? Cilat analiza janë përgatitur? Cilat politika janë evoluuar? Cilat rekomandime kanë dalë prej tyre? Si janë përdorur të dhënat? Çfarë kontributi kanë dhënë këto qendra në zhvillimin e politikave? Këto janë pyetjet që duhet t’i parashtrojmë.
Jo për ta kufizuar punën politike, por për ta bërë më serioze, më cilësore dhe më të përgjegjshme“, theksoi Shasivari.
Ministri e theksoi edhe rëndësinë e bashkëpunimit ndërpartiak në fushën e hulumtimit dhe shkëmbimit të njohurive.
„Mund të mos pajtohemi rreth zgjidhjeve, por mund të pajtohemi se zgjidhjet duhet të bazohen në të dhëna të sakta dhe analizë serioze“, tha Shasivari.
Si Ministri e Drejtësisë, përgjegjësia jonë është të sigurojmë kornizë të qartë dhe funksionale juridike.
