Ferran Torres, 26 vjeç, la Barcelonën për Parisin gjatë kësaj vere, në një prej lëvizjeve më të bujshme të merkatos. Sulmuesi spanjoll e ka nisur në mënyrë pozitive aventurën e tij të re, teksa ka shënuar shtatë gola në gjashtë ndeshje me skuadrën e drejtuar nga Luis Enrique, trajnerin që Torres e konsideron si “babain e tij futbollistik”.
Sulmuesi spanjoll tregoi se ka nisur edhe mësimet e gjuhës frënge, ndonëse pranoi se fillimi nuk ka qenë aspak i lehtë. Në dhomën e zhveshjes, përveç stafit teknik, ai ka gjetur edhe dy bashkëkombësit e tij, Fabián Ruiz dhe Dro Fernández. “I vetmi që nuk mund ta marr me vete është Pedri”, u shpreh me shaka Torres.
Në listën prej 30 kandidatëve për “Topin e Artë” janë gjashtë futbollistë spanjollë: Lamine Yamal, Pau Cubarsí, Marc Cucurella, Rodri, Fabián Ruiz dhe vetë Ferran Torres.
Deri tani, Torres ka qenë titullar në tre ndeshje me PSG-në. Ai debutoi me një dopietë ndaj Rennes, ndërsa më pas realizoi një tripletë kundër Slovan Bratislavës. Sulmuesi valencian ka shënuar gjithashtu ndaj Brest dhe Olympique Marseille.
Në klasiken e futbollit francez ndaj Marseille, Torres e nisi ndeshjen nga stoli, por ishte pikërisht ai që hapi serinë e golave. PSG-ja triumfoi 2-1 dhe mori një tjetër rezultat pozitiv në kampionat. Skuadra e Luis Enriques renditet aktualisht në vendin e gjashtë në Ligue 1, me dy fitore, dy barazime dhe një humbje.
