Rusia ka lëshuar një paralajmërim të ashpër ndaj vendeve baltike, duke kërcënuar me një përgjigje “vendimtare” dhe “shkatërruese” ndaj asaj që Moska i cilëson si veprime armiqësore.
Deklarata e zëdhënëses së Ministrisë së Jashtme ruse, Maria Zakharova, vjen pas një incidenti me dronë pranë kufirit të Estonisë, ku disa mjete fluturuese hynë në hapësirën ajrore estoneze.
Në reagim ndaj situatës, avionë luftarakë të NATO-s u ngritën nga baza Ämari në Estoni, ndërsa autoritetet estoneze aktivizuan paralajmërimin për kërcënim ajror. Ministri i Jashtëm estonez, Margus Tsahkna, deklaroi se rreziku kishte kaluar dhe se NATO reagoi me shpejtësi, sipas procedurave të përcaktuara.
Tensionet në rajonin baltik vijnë në një periudhë të rritjes së incidenteve ajrore dhe ushtarake në krahun lindor të NATO-s. Aleanca ka forcuar prej kohësh praninë dhe mbikëqyrjen ajrore në rajon, duke e konsideruar mbrojtjen e hapësirës ajrore të vendeve anëtare një prioritet.
Ndërkohë, në të njëjtën kohë, luftimet mes Rusisë dhe Ukrainës janë përshkallëzuar, me sulme të njëpasnjëshme me dronë dhe raketa. Vetëm gjatë natës së fundit, sulmet ruse në Kiev dhe rrethinat e tij shkaktuan viktima dhe dëme të konsiderueshme.
