Pasditen e 24 gushtit, Presidenti Xi Jinping zhvilloi bisedime në Sallën e Madhe të Popullit në Pekin me Mbretin Abdullah II të Jordanisë, i cili po bën një vizitë shtetërore në Kinë.
Xi Jinping theksoi se që nga vendosja e lidhjeve diplomatike midis Kinës dhe Jordanisë, të dy vendet gjithmonë e kanë respektuar njëri-tjetrin, e kanë trajtuar si të barabartë dhe kanë bashkëpunuar për përfitime të ndërsjella. Ky është një portretizim i gjallë i bashkëpunimit fitimprurës dhe i të mësuarit të ndërsjellë, midis vendeve me sisteme dhe madhësi të ndryshme shoqërore.
Xi Jinping theksoi se Kina vlerëson rolin unik dhe të rëndësishëm të Jordanisë në rajon, mbështet fuqimisht Jordaninë në mbrojtjen e sovranitetit kombëtar, sigurisë dhe interesave të zhvillimit, si dhe është e gatshme të forcojë shkëmbimet me Jordaninë në të gjitha nivelet, duke përfshirë qeveritë, partitë politike, organet legjislative dhe qeveritë lokale, dhe të rrisë shkëmbimet e përvojave në qeverisje.
Kina është e gatshme të punojë me Jordaninë për të zbatuar Katër Iniciativat Globale, për të forcuar koordinimin dhe bashkëpunimin në institucione shumëpalëshe si Kombet e Bashkuara, për të mbrojtur së bashku sistemin ndërkombëtar me Kombet e Bashkuara në thelbin e tij dhe rendin ndërkombëtar të bazuar në të drejtën ndërkombëtare, dhe për të promovuar ndërtimin e një komuniteti me një të ardhme të përbashkët për njerëzimin.
Mbreti i Mbretërisë Hashemite të Jordanisë, Abdullah II ibn Al-Hussein shpreh se Kina është një vend i madh që ka arritur një zhvillim të madh gjë që është e admirueshme. Jordania i përmbahet fuqimisht politikës “një Kinë” dhe e konsideron Tajvanin një pjesë integrale të territorit të Kinës. Jordania i kushton rëndësi të madhe marrëdhënieve të saj me Kinën dhe është e përkushtuar për thellimin e bashkëpunimit dhe shkëmbimeve me Kinën në fusha të tilla si tregtia, prodhimi, bujqësia, shkenca dhe teknologjia, mjekësia, kultura dhe arsimi. Jordania mirëpret më shumë ndërmarrje kineze që të investojnë në Jordani për të arritur zhvillim dhe prosperitet të përbashkët.
Të dy krerët e shteteve shkëmbyen pikëpamje mbi situatën në Lindjen e Mesme. Xi Jinping theksoi se Kina ka mbështetur vazhdimisht një armëpushim gjithëpërfshirës dhe zgjidhjen e mosmarrëveshjeve përmes mjeteve politike dhe diplomatike, dhe beson se sovraniteti dhe siguria e vendeve të rajonit, përfshirë Jordaninë, duhet të respektohen.
Çështja palestineze është thelbi i çështjes së Lindjes së Mesme dhe promovimi i zgjidhjes së saj duhet t’i përmbahet katër parimeve: Së pari, duhet të mbështetet një zgjidhje politike, e ankoruar në drejtimin e saktë të “zgjidhjes me dy shtete”, duke promovuar rifillimin e bisedimeve të paqes izraelito-palestineze dhe duke arritur një shtet të hershëm palestinez. Së dyti, duhet të mbështetet “qeverisja nga palestinezët”, pasi Palestina është atdheu i të gjithë palestinezëve, dhe parimi i “qeverisjes nga palestinezët” duhet të mbështetet në avancimin e qeverisjes së Bregut Perëndimor dhe rindërtimin pas luftës në Gazë. Së treti, duhet të mbështetet humanitarizmi dhe bashkësia ndërkombëtare, veçanërisht Këshilli i Sigurimit i OKB-së, duhet të marrë me seriozitet përgjegjësitë e saj për të mbrojtur sigurinë civile, për të siguruar ndihmë humanitare dhe për të parandaluar katastrofat humanitare. Së katërti, drejtësia duhet të mbështetet, bazuar në sundimin ndërkombëtar të ligjit, duke synuar adresimin si të simptomave ashtu edhe të shkaqeve rrënjësore, si dhe duke ndërmarrë veprime pragmatike si rruga për të promovuar një zgjidhje të hershme, gjithëpërfshirëse, të drejtë dhe të qëndrueshme për çështjen palestineze.
Mbreti Abdullah II ibn Al-Hussein tha se Jordania e vlerëson shumë qëndrimin e vazhdueshëm të paanshëm të Kinës mbi çështjet e Lindjes së Mesme dhe mbështetjen e saj për kauzën e drejtë të vendeve arabe. Ai theksoi rëndësinë e qëndrimit të drejtë të Kinës për vendet në rajon. Jordania është e gatshme të mbajë komunikim të ngushtë me Kinën dhe të vazhdojë të bëjë përpjekje pozitive për të lehtësuar situatën aktuale, në mënyrë që popujt e Lindjes së Mesme të mund të gëzojnë paqe dhe prosperitet
Pas bisedimeve, të dy krerët e shteteve morën pjesë së bashku në nënshkrimin e disa dokumenteve të bashkëpunimit në fushat e diplomacisë, tregtisë dhe ekonomisë, zinxhirëve të furnizimit dhe drejtësisë.
Të dyja palët publikuan një Deklaratë të Përbashkët mbi Thellimin e Partneritetit Strategjik Kinë-Jordani.
Në mbrëmje, Xi Jinping organizoi një banket mirëseardhjeje për Mbretin Abdullah II ibn Al-Hussein në Sallën e Artë të Sallës së Madhe të Popullit.
Wang Yi mori pjesë në aktivitetet e mësipërme
