Numri i të papunëve ka arritur nën 90.000 persona. Autoritetet vlerësojnë se kjo shifër nuk është realiste, sepse për momentin ajo përfshin edhe persona të moshës 16 deri në 18 vjeç, si dhe fermerë që regjistrohen si të papunë, por gjenerojnë të ardhura.
Tregu i punës në Maqedoni tregoi përmirësim të moderuar në tremujorin e parë të këtij viti, me një rënie të numrit të të papunëve. Megjithatë, trendi pozitiv shoqërohet me një rritje të punësimit informal, gjë që tregon se disa vende pune mbeten jashtë rrjedhës zyrtare. Sipas të dhënave më të fundit nga Enti Shtetëror i Statistikave, në tremujorin e parë të vitit 2026, në vend kishte 797 884 persona ekonomikisht aktivë, nga të cilët 707.385 ishin të punësuar dhe 90.499 ishin të papunë. Krahasuar me tremujorin e fundit të vitit 2025, numri i të papunëve është ulur me një përqind, ndërsa rënia vjetore është 2.3 për qind. Në të njëjtën kohë, numri i të punësuarve ka shënuar një rënie të lehtë prej 0.3 për qind, gjë që tregon se pavarësisht uljes së papunësisë, punësimi nuk po rritet me të njëjtin ritëm.
Shkalla e papunësisë në tremujorin e parë ishte 11.3 për qind, ndërsa shkalla e punësimit arriti në 46.5 për qind. 52.5 për qind e popullsisë në moshë pune ishte ekonomikisht aktive. Së fundmi numri i të papunëve ka arritur nën 90.000 persona. Autoritetet vlerësojnë se kjo shifër nuk është realiste, sepse për momentin ajo përfshin edhe persona të moshës 16 deri në 18 vjeç, si dhe fermerë që regjistrohen si të papunë, por gjenerojnë të ardhura.
Tashmë është formuar një grup që do të punojë në pastrimin e listës nga Agjencia e Punësimit dhe krahasimin e të dhënave me listën e përfituesve të ndihmës sociale, thekson zëvendësministri i Ekonomisë dhe Punës, Marjan Risteski.”Pastrimi i listës së Agjencisë është gjithashtu një kërkesë e Bashkimit Evropian. Kur të dhënat të krahasohen, ato do të pastrohen dhe problemi i njerëzve që përdorin masa sociale, pompojnë fonde nga buxheti, dhe nuk kanë të drejtë ta bëjnë këtë, do të zgjidhet njëherë e përgjithmonë”, shton Risteski. Sipas tij, qëllimi ishte që numri i të papunëve të ulet nën 90.000 në vitin e parë, dhe pastaj qëllimi tjetër është që numri i të papunëve të ulet nën 80.000.
“Më lejoni të përmend se nga ata 86.000 ose 85.000 të papunë, një pjesë e madhe merret me bujqësi, dhe pjesa tjetër janë ata njerëz që ende nuk e kanë përfunduar arsimin e mesëm, dhe janë të regjistruar në listën e vetë të papunëve – këta janë njerëz nga 16 deri në 18 vjeç. Dua të them se numri është shumë më i ulët dhe është diku rreth 40.000-45.000, dhe kjo është 5-6 për qind e popullsisë në moshë pune në Maqedoni. Që do të thotë, historikisht shkalla më e ulët e papunësisë që nga pavarësia e Maqedonisë”, shtoi Risteski gjatë një vizite në Agjencinë e Punësimit në Shtip. Gjatë vitit 2025, u krijuan 15.000 vende të reja pune dhe, sipas zëvendësministrit të Ekonomisë, Marjan Risteski, kjo i detyrohet kryesisht zonave Teknologjike, por edhe ekonomisë vendase, e cila riinvestoi në objektet ekzistuese duke rritur vëllimin e punës dhe nevojën për punë.
Ulja e papunësisë sipas ekspertëve i detyrohet edhe masave qeveritare, hapjes së vendeve të punës në privat dhe shtet , por edhe faktit se qytetarët po punojnë pa qenë të regjistruar si dhe vajtjes së tyre për punë sezonale apo të përhershme jashtë shtetit. Sipas Planit të fundit Operacional të Punësimit për vitin 2026, i cili u njoftua së fundmi,disa nga fondet janë ridrejtuar nga masa më pak tërheqëse në vetëpunësim dhe programe punësimi, me qëllim që të sigurohet një efekt më i madh në tregun e punës.
Plani Operacional për Punësim për vitin 2026, i cili vlen gati 40 milionë euro dhe parashikon mbulimin e më shumë se 10,000 personave. Nga këto fonde, mbi 32 milionë euro janë të destinuara drejtpërdrejt për krijimin e vendeve të reja të punës dhe mbështetjen e masave aktive të punësimit. Masa për vetëpunësim dhe sipërmarrje është veçanërisht e rëndësishme, përmes së cilës pritet të krijohen më shumë se 2,000 vende të reja pune. Kjo është një masë që tashmë e ka konfirmuar suksesin e saj në kuadër të Planit Operacional për vitin 2025, kur u themeluan më shumë se 2,200 subjekte të reja juridike, të cilat kontribuan në zhvillimin e sipërmarrjes dhe ekonomisë lokale. Të rinjtë mbeten një nga prioritetet kryesore të Qeverisë. Plani Operacional për vitin 2026 parashikon përfshirjen e gati 6,000 të rinjve deri në moshën 29 vjeç në masa të ndryshme për punësim, trajnim dhe zhvillim profesional.
Të rinjtë nën 29 vjeç që duan të fillojnë biznesin e tyre do të mund të marrin një grant deri në 10,000 euro, ndërsa personat mbi 29 vjeç do të kenë të drejtë për mbështetje financiare deri në 7000 euro. Përveç kësaj, nëse dy të rinj bashkojnë forcat dhe themelojnë një shoqëri me përgjegjësi të kufizuar, mbështetja totale mund të arrijë deri në 20.000 euro.
