Në Shqipëri, një tjetër segment i Korridorit 8, në aksin Elbasan-Qafë Thanë, është hapur për qarkullim, duke sjellë përmirësime për udhëtarët që kalojnë përmes pikës kufitare të Qafë Thanës.
Segmenti i ri prej 7.5 kilometrash shtrihet nga dalja e fshatit Labinot-Fushë deri rreth 500 metra pas fshatit Mirakë dhe tashmë është i hapur me dy korsi për qarkullim.
Kryeministri i Shqipërisë, Edi Rama, dhe ministri i Infrastrukturës dhe Energjisë, Enea Karakaçi, njoftuan se ky investim është pjesë e projektit për zgjerimin dhe modernizimin e Korridorit 8, një nga akset më të rëndësishme që lidh Shqipërinë me vendet e rajonit.
Sipas tyre, hapja e këtij segmenti do të përmirësojë qarkullimin, do të rrisë sigurinë rrugore, do të shkurtojë kohën e udhëtimit dhe do të lehtësojë transportin e qytetarëve dhe mallrave.
Korridori 8 ka rëndësi të veçantë edhe për qytetarët e Maqedonisë së Veriut, pasi përmes Qafë Thanës është një nga rrugët kryesore për udhëtimet drejt Shqipërisë dhe bregdetit shqiptar.
Pas përfundimit të plotë të projektit, aksi Elbasan–Qafë Thanë pritet të shndërrohet në rrugë interurbane me katër korsi, duke përmirësuar lidhjen mes dy vendeve.
