Fshati-fantazmë që po fundoset: Turistët testojnë ekuilibrin brenda kishës

Bëhet fjalë për Ropoto, në Thesali të Greqisë. I vendosur në shpatet e malit Karavoula, në rajonin e Trikalas, fshati dikur ndodhej në një lartësi prej rreth 750 metrash, ndërsa sot është fundosur të paktën 40 metra nga pozicioni fillestar.

Një fshat i vogël që po zhytet gradualisht nën tokë si pasojë e rrëshqitjeve të vazhdueshme të dheut. Bëhet fjalë për Ropoto, në Thesali të Greqisë. I vendosur në shpatet e malit Karavoula, në rajonin e Trikalas, fshati dikur ndodhej në një lartësi prej rreth 750 metrash, ndërsa sot është fundosur të paktën 40 metra nga pozicioni fillestar.

Një nga rrëshqitjet më shkatërruese ndodhi më 12 prill 2012, kur disa prej banesave të mbetura u zhvendosën pothuajse të paprekura disa metra poshtë shpatit. Pjesa më e madhe e ndërtesave të tjera ishte dëmtuar rëndë më herët, me mure dhe themele të çara apo të shkatërruara plotësisht.

Sot Ropoto është thuajse i braktisur. Simboli i tij mbetet kisha e anuar e Panagia Theotokos, një ndërtesë e madhe që ende qëndron në shpatin e malit dhe ofron një pamje të pazakontë. Ai është bërë i famshëm edhe për faktin se nuk mund të ecet vertikalisht. Një video e disa turistëve që testojnë ekuilibrin brenda kishës është bërë virale në internet.

Dikur fshati kishte rreth 800 banorë, por katastrofa natyrore e bëri atë të pabanueshëm dhe shumica e familjeve u detyruan të largoheshin. Disa banorë kanë vendosur të qëndrojnë ende aty, duke jetuar në kasolle dhe strehime të ndërtuara prej tyre. Ata shprehen të zhgënjyer nga mungesa e ndërhyrjeve për shpëtimin e fshatit, ndërsa rrëshqitjet vazhdojnë të ndryshojnë terrenin. Sot në Ropoto mund të shihen rrugë të çara, ndërtesa të përgjysmuara dhe themele banesash të dëmtuara në mënyrë të pakthyeshme.

Historia e këtij fshati mori vëmendje ndërkombëtare në vitin 2016, kur banorët zbuluan se Ropoto nuk ishte përfshirë fillimisht në listën e zonave që përfitonin lehtësime nga taksa e pronës. Pas reagimeve të forta, kërkesat e tyre u morën parasysh dhe po atë vit u publikua një dokumentar me titullin “Fshati fantazmë i Greqisë që po fundoset”.

Sipas banorëve të vjetër, rrëshqitjet e para të dheut nisën që në vitet 1960, por masat mbrojtëse të nevojshme nuk u realizuan. Pavarësisht sinjaleve të hershme të rrezikut, gjatë viteve 1980 vijuan të jepen leje ndërtimi pa marrë parasysh problemet e tokës. Fundosja e zonës dëmtoi edhe ekonominë e fshatit, duke shkatërruar plantacionet me qindra pemë molle që dikur ishin burimi kryesor i të ardhurave për banorët.